Янги йўлак Амир Темур шоҳкўчаси билан Шаҳрисабз кўчаси кесишмасидан Махтумқули кўчаси билан кесишмагача бўлган ҳудудни қамраб олади. У Тошкент давлат шарқшунослик университетидан Тошкент шаҳар 6-сон туғруқ мажмуасигача бўлган йўналишда жойлашган.
BRT — автобусларнинг алоҳида ажратилган йўлакларда устувор ҳаракатланишини таъминловчи тезкор жамоат транспорти тизими. Унинг асосий вазифаси автобусларнинг йўлдаги умумий транспорт оқимига боғлиқлигини камайтириш, қатнов вақтини қисқартириш ва ҳаракат мунтазамлигини оширишдан иборат.
Йўлнинг марказий қисмида ташкил этилган алоҳида йўлаклар автобусларнинг тирбандликлар таъсирида кечикишини камайтиришга хизмат қилади. Бу эса йўловчиларга сафар вақтини олдиндан режалаштириш ва жамоат транспортидан самаралироқ фойдаланиш имконини беради.
Пойтахтда BRT инфратузилмасини босқичма-босқич кенгайтириш ишлари ҳам олиб борилмоқда. Истиқболда Сергели ва Юнусобод туманларини ўзаро боғлайдиган ягона транспорт йўлагини шакллантириш кўзда тутилган.
Лойиҳанинг кейинги босқичларида йўл ҳаракатини ташкил этишдаги ўзгаришлар ва қурилиш ишлари жадвали бўйича қўшимча маълумотлар тақдим этилиши кутилмоқда.
BRT йўлакларининг кенгайиши Тошкентда жамоат транспортининг жозибадорлигини ошириш ва аҳолининг кундалик қатновларга сарфлайдиган вақтини қисқартиришга қаратилган чора-тадбирларнинг бир қисмидир.
