Давлатимиз раҳбари ўз нутқида сўнгги йилларда мамлакатимизда “Халқ давлат идораларига эмас, давлат идоралари халққа хизмат қилиши лозим” деган тамойил давлат сиёсати даражасига кўтарилганини таъкидлади. Ислоҳотлар марказида инсон қадрини улуғлаш, фуқаролар ва тадбиркорлар учун муносиб шароит яратиш мақсади турибди.
Қайд этилганидек, самарали давлат бошқарувисиз ҳеч бир соҳада кутилган натижага эришиб бўлмайди. Ҳар бир фуқаро кундалик ҳаётида ҳис қилаётган ижобий ўзгаришлар орқали давлат фаолиятига баҳо беради. Шу боис, бошқарув идоралари одамларнинг муаммоларини ўз вақтида, адолатли ва тизимли ҳал этиши зарур.
Ортиқча қоғозбозлик ва бюрократия ислоҳотлар самарасини пасайтириши, аҳолининг давлатга ишончини сусайтириши таъкидланди. Шу нуқтаи назардан, давлат бошқарувида янгича ва илғор ёндашувларни жорий этишга алоҳида эътибор қаратилмоқда.
Бу борада Бирлашган Араб Амирликлари билан ҳамкорлик муҳим ўрин тутмоқда. Сўнгги йилларда давлат бошқаруви соҳасида икки мамлакат ўртасидаги шериклик янги босқичга кўтарилди. Ўтган йил ноябрь ойида бюрократияни бартараф этиш ва сунъий интеллект бўйича халқаро форумлар биргаликда юқори савияда ўтказилди, давлат бошқарувида илғор тажриба алмашиш юзасидан ҳамкорлик келишуви имзоланди.
“Сифатли давлат бошқаруви” дастури ана шу ҳамкорликнинг амалий натижаси сифатида баҳоланди.
Президентимиз мазкур дастур давлат идоралари фаолиятини холис баҳолаш, уларнинг кучли ва заиф томонларини аниқлаш, илғор тажрибаларни кенг оммалаштириш ҳамда соғлом рақобат муҳитини шакллантиришга хизмат қилишини таъкидлади.
Жорий йил январь-апрель ойларида дастур доирасида 40 та республика идораси фаолияти, бошқарув сифати ва раҳбар кадрларнинг етакчилик қобилияти халқаро экспертлар ҳамда маҳаллий мутахассислар томонидан баҳоланди.
Тақдирлаш маросимида бир қатор вазирлик ва идоралар эришган натижалари учун эътироф этилди.
Адлия вазирлиги “Ўзбекистон – 2030” стратегиясини амалга ошириш бўйича энг намунали вазирлик номинациясида ғолиб деб топилди. Қайд этилганидек, вазирлик қисқа вақтда замонавий, очиқ ва рақамли адлия институтига айланди. Бугунги кунда 30 та платформа орқали 380 та хизмат тўлиқ рақамлаштирилган, 780 дан ортиқ хизматдан онлайн фойдаланиш имконияти яратилган, 208 та давлат хизматлари маркази бутун мамлакат бўйлаб ягона стандарт асосида ишламоқда.
Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди. Вазирликда ажратилган маблағлар янги конларни қидириб топиш ва соҳани ривожлантиришга йўналтирилгани, геология-қидирув ишларида сув сарфи 20 фоизга қисқартирилгани, асосий кончилик ускуналарининг маҳаллийлаштириш даражаси 84 фоизга етказилгани таъкидланди.
Ички ишлар вазирлиги давлат хизматларини кўрсатишдаги ижобий натижалари учун энг намунали деб топилди. Вазирлик томонидан кўрсатилаётган 60 га яқин хизматнинг 95 фоизи рақамли шаклга ўтказилган. Илгари тарқоқ бўлган 72 та маълумотлар базаси ягона “Хавфсиз шаҳар” тизимига бирлаштирилиб, унга 14 та бошқарув маркази ва 20 дан ортиқ вазирлик уланган. Ўтган йили 148 мингдан зиёд маъмурий иш масофавий тарзда кўриб чиқилган.
Танлов доирасида намунали раҳбар ва мутахассис ходимлар ҳам тақдирланди. Тоғ-кон саноати ва геология вазирлиги бошқарма бошлиғи Мақсуд Болибеков энг намунали раҳбар ходим, Олий таълим, фан ва инновациялар вазирлиги бўлим бошлиғи Фазлиддин Мўминов энг намунали маъмурий ходим, “Ўзатом” агентлиги бош мутахассиси Шоҳмирзо Умаров энг намунали мутахассис ходим, Камбағалликни қисқартириш ва бандлик вазири маслаҳатчиси Умматой Йўлдошева энг намунали аёл ходим, Олий таълим, фан ва инновациялар вазирлиги лойиҳа офиси раҳбари Акбархон Собирхонов энг намунали истеъдодли ёш ходим, Адлия вазирлиги бўлим бошлиғи Мирсаид Рахматов инсон ресурслари бўйича энг намунали ходим сифатида ғолиб бўлди.
Соғлиқни сақлаш вазирининг ўринбосари Олим Омонов энг намунали вазир ўринбосари, Атом энергияси агентлиги директори Азим Аҳмадхўжаев энг намунали агентлик директори, Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Халилилло Тўрахўжаев энг намунали қўмита раиси сифатида эътироф этилди.
Давлатимиз раҳбари эътироф этилган ходимларни лавозимини бир поғонага кўтариш ва раҳбар кадрлар захирасига киритиш таклифини билдирди. Уларнинг ўз устида доимий ишлаши, янгича фикрлаши ва меҳнат фаолиятига инновацион ёндашувларни татбиқ этиши бошқалар учун ўрнак бўлиши лозимлиги таъкидланди.
Президентимиз келгуси босқичларда дастур янада очиқ ва талабчан бўлишини қайд этди. Бундан буён яхши натижа кўрсатган идоралар билан бирга самарадорлик ва хизмат сифати бўйича ортда қолаётган ташкилотлар ҳам очиқ айтилади. Бу давлат идораларини ўз фаолиятига холис баҳо бериш, камчиликларни бартараф этиш ва аҳоли олдидаги масъулиятини оширишга ундайди.
Эндиликда “Сифатли давлат бошқаруви” дастури ҳар икки йилда ўтказилади. Келгуси босқичдан унда маҳаллий ҳокимликлар ҳам иштирок этади. Чунки ислоҳотлар натижаси, аввало, қуйи бўғинда, туман ва шаҳарлар даражасида сезилиши керак.
Давлатимиз раҳбари халқ ишонадиган, инсон қадрини улуғлайдиган, одамларнинг оғирини енгил қиладиган самарали давлат тизимини яратиш бундан кейин ҳам устувор вазифа бўлиб қолишини таъкидлади. Вазирлик ва идоралар фаолиятида “жараён учун” эмас, “натижа учун” ишлаш тамойили асосий мезонга айланиши зарурлиги қайд этилди.
