Ҳужжат аҳоли тинчлиги, мамлакатимиз хавфсизлиги, иқтисодий барқарорлигини мустаҳкам ҳимоя қилиш чораларини янада кучайтиришга қаратилган.
Қонун лойиҳаси билан давлат чегараси орқали товар-моддий бойликлар, хорижий валюта, қимматбаҳо металлар ва бошқа предметларни ноқонуний олиб ўтиш, божхона назоратини четлаб ўтиш билан боғлиқ жавобгарлик кучайтирилмоқда.
Хусусан, давлат чегараси орқали ер остида ноқонуний қурилган иншоотлар, туннеллар ёки бошқа инфратузилмадан фойдаланган ҳолда божхона тўғрисидаги қонунчиликни бузиш оғирлаштирувчи ҳолат сифатида белгиланмоқда.
Шу билан бирга, давлат чегараси орқали ер остида ноқонуний қурилган иншоотлар ва туннеллардан фойдаланган ҳолда қонунга хилоф равишда чет элга чиқиш, Ўзбекистон Республикасига кириш ёки давлат чегарасидан ўтиш учун ҳам жавобгарлик кучайтирилмоқда.
Қонун лойиҳасида давлат чегараси орқали ер остида ноқонуний иншоотлар ва туннеллар қуриш, инфратузилма барпо этиш, улардан фойдаланиш ҳамда мазкур фаолиятни молиялаштириш учун ҳам алоҳида жиноий жавобгарлик жорий этилмоқда.
