Лойиҳанинг асосий мақсади давлат хизматчиларида коррупциявий ҳуқуқбузарликларнинг муқаррар ҳуқуқий ва ижтимоий оқибатлари ҳақида аниқ тасаввур шакллантириш, хизмат ваколатларини ҳалоллик ва қонун устуворлиги тамойиллари асосида амалга ошириш масъулиятини янада кучайтириш ҳамда коррупцияга нисбатан муросасиз муносабатни қарор топтиришдан иборат.
Режага мувофиқ, профилактик ташрифларга давлат бошқаруви органлари раҳбарлари ва масъул ходимлари босқичма-босқич жалб этилмоқда.
Бу галги ташриф Олмалиқ шаҳридаги 14-сон жазони ижро этиш колониясига Мактабгача ва мактаб таълими, Олий таълим, фан ва инновациялар ҳамда Камбағалликни қисқартириш ва бандлик вазирликлари раҳбарлари ва масъул ходимлари иштирокида амалга оширилди.
Ташриф давомида иштирокчилар жазони ижро этиш муассасасидаги шароитлар, сақлаш камералари ҳамда муассаса инфратузилмаси билан таништирилди.
Маҳкумлар билан ўтказилган очиқ мулоқотлар давлат хизматчилари учун коррупциянинг оқибатлари фақат жиноий жавобгарлик билан чекланмаслиги, балки инсоннинг бутун ҳаёти, оиласи, қадр-қиммати ва фарзандлари келажагига салбий таъсир кўрсатувчи, кўпинча қайтариб бўлмас йўқотишларга сабаб бўлишини англатувчи ҳаётий сабоқ бўлди.
Коррупциянинг оқибатларини бартараф этишдан кўра унинг олдини олиш устувор вазифа эканлигидан келиб чиқиб, Агентлик бундай профилактик ташрифларни мунтазам давом эттиради.
