Танловнинг асосий мақсади — маҳаллаларда санитария ва ободонлаштириш ишларини янада яхшилаш, чиқиндиларни тўғри бошқариш ва саралаш тизимини ривожлантириш, аҳолининг экологик маданиятини юксалтириш, атроф-муҳитни муҳофаза қилишга қаратилган ташаббусларни қўллаб-қувватлаш, шунингдек, яшил ҳудудларни кенгайтириш ва экологик инфратузилмани ривожлантиришдан иборат.
Ғолиб маҳаллаларни рағбатлантириш тартиби
Танлов якунларига кўра, 14 та маҳалла ғолиб деб топилади. Ҳар бир ғолиб маҳаллага Экология жамғармаси маблағлари ҳисобидан 500 миллион сўм ажратилади ҳамда хизмат фаолияти учун биттадан электромобил топширилади.
Ажратилган маблағлар чиқинди йиғиш майдончаларини ташкил этиш, ижтимоий объектларга чиқинди контейнерларини ўрнатиш ва ҳудудни кўкаламзорлаштириш ишларига йўналтирилади.
Мазкур рағбатлантириш чоралари маҳаллаларда экологик инфратузилмани яхшилаш ва ободонлаштириш ишларини янада ривожлантиришга хизмат қилади.
Танловда иштирок этиш учун керакли ҳужжатлар ва тартиби
Танловда иштирок этиш учун аризага қуйидаги ҳужжат ва маълумотлар илова қилинади:
1. Маҳалла паспорти.
2. Маҳалланинг экологик ҳолати ва амалга оширилган ишларини тасдиқловчи материаллар, жумладан:
- ижтимоий объектлардаги мавжуд чиқинди контейнерлари ҳамда кўчаларга ўрнатилган чиқинди қутилари сони;
- чиқиндиларни йиғиш шохобчалари сони ва уларнинг ҳолати;
- санитария тозалаш хизматлари бўйича тўлов интизоми ва дебитор қарздорлик ҳолати;
- чиқиндиларни тўплаш, саралаш ва олиб чиқиб кетиш ишларининг ташкил этилганлик даражаси;
- маҳаллани чиқиндилардан холи ҳудудга айлантириш бўйича амалга оширилган ишлар;
- аҳолининг экологик маданиятини оширишга қаратилган тарғибот-ташвиқот ишлари;
- атроф-муҳитни муҳофаза қилишга оид ишларнинг оммавий ахборот воситаларида ёритилиши;
- дарахт ва буталарни парваришлашда сувни тежайдиган технологиялардан фойдаланиш даражаси;
- табиий ресурслардан оқилона фойдаланиш ва уларни қайта тиклаш борасидаги ташаббуслар;
- чиқиндиларни саралаб йиғиш тизимининг жорий этилганлиги;
- “Яшил макон” лойиҳаси доирасида экилган дарахт ва буталарнинг ҳолати;
- энергия тежовчи технологиялардан фойдаланиш даражаси.
Ушбу маълумотларни тасдиқловчи ҳужжатлар нусхалари, фотоалбом ҳамда 10 дақиқадан ошмаган видеолавҳа-тақдимот ҳам илова қилиниши лозим.
Муҳим!
Танловда иштирок этиш учун 1 октябрдан бошлаб Ўзбекистон маҳаллалари уюшмасининг туман (шаҳар) бўлимларида аризаларни қабул қилиш бошланади. Аризалар 30 октябрга қадар қабул қилинади.
Танловда иштирок этиш учун тақдим этилган маълумотларнинг тўғрилиги ва ҳаққонийлиги учун жавобгарлик маҳалла раиси зиммасига юкланади. Шу сабабли маҳаллада амалга оширилган ишлар, мавжуд экологик инфратузилма, ҳудуднинг тозалиги ва ободонлаштирилганлик ҳолати ҳамда экологик ташаббуслар ҳақидаги маълумотлар аниқ, тўлиқ ва ҳаққоний тарзда тақдим этилиши лозим.
