Вилоят Экология ва иқлим ўзгариши бош бошқармаси маълумотига кўра, Экологик полиция тезкор гуруҳи ходимлари Поп туманида назорат тадбири ўтказган.

Тадбир давомида «Якатут» маҳалла фуқаролар йиғини ҳудудидан оқиб ўтувчи Сирдарёдан тақиқланган ов воситаларидан фойдаланган ҳолда балиқ овлаган икки нафар фуқаро аниқланган. Улардан бири Мингбулоқ туманида, иккинчиси Тўрақўрғон туманида яшовчи А.У. ва А.А. экани маълум қилинди.

Ҳуқуқбузарлардан балиқларнинг 7 турига мансуб жами 31 донаси аниқланган. Шундан 8 донаси Ўзбекистон Қизил китобига киритилган «Туркистон мўйловдори» (шималиқ) экани тасдиқланган.

Қайд этилишича, ҳайвонот дунёсига электр токли қармоқдан фойдаланиб зарар етказган шахсларга нисбатан тегишли ҳужжатлар расмийлаштирилган. Тўпланган материаллар ва ашёвий далиллар ҳуқуқий баҳо бериш учун прокуратура органларига юборилмоқда.