1. Бош прокуратура ҳузуридаги Департаментнинг Ангрен шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаро А.Я. фуқаро Т.Ф.га “Соғлом” МФЙ ҳудудидаги давлат захирасидаги 30 сотих ер майдонини сотишини ва гўёки кадастр палатасининг Ангрен филиалида ишловчи таниши орқали ҳужжатларини унинг номига расмийлаштириб беришини айтиб, 55 000 АҚШ долларини олган вақтида ашёвий далиллар билан ушланган.

2. Департаментнинг Ғиждувон тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “R.M.” фермер хўжалиги раҳбари Х.М. “Қутчи” массивидаги 45,6 гектар ер майдонининг 2,7 гектар қисмини 36 000 АҚШ доллари эвазига фуқаро У.А.нинг номига вилоят кадастрлар палатасида ишловчи танишлари орқали расмийлаштириб беришини айтиб, келишилган пулдан 32 000 АҚШ долларини олган вақтида ашёвий далиллар билан ушланган.

3. Департаментининг Сурхондарё вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда Ангор туманидаги “J.Y.” фермер хўжалиги раҳбари П.Т. (муқаддам ЖКнинг 168-моддаси билан судланган) “Илғор” МФЙ ҳудудидаги 7,7 гектар майдонини 800 млн сўм эвазига фуқаро Н.У.га сотишини айтиб, 2024 йилда 520 млн сўмини фирибгарлик йўли билан қўлга киритганлиги аниқланиб, қолган 280 млн сўмини олган вақтида ашёвий далиллар билан ушланган.

4. Департаментнинг Фарғона вилояти бошқармаси бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда Учкўприк туманидаги “D.B.” фермер хўжалиги раҳбари П.Т. гўёки юқори лавозимда ишловчи танишлари орқали “Ш.Отажонов” ММТП ҳудудидаги 83,4 гектар суғориладиган ер майдонидан 39 гектарини фуқаро А.Я.нинг номига расмийлаштириб беришини айтиб, 23 000 АҚШ долларини олган вақтида ашёвий далиллар билан ушланган.

5. Департаментнинг Иштихон тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “Ch.Q.” фермер хўжалиги раҳбари А.Т. фуқаро Ж.Ғ.нинг ишончига кириб, 360 млн сўм эвазига фермер хўжалигининг “Бахрин” МФЙ ҳудудидаги 6 гектар ер майдонини савдо биноси қуриши учун сотиши ва ҳужжатларини расмийлаштириб беришини айтиб, келишилган пуллардан 200 млн сўмини фирибгарлик йўли билан олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.