Бу учрашув олдидан Атланта шаҳридаги Mercedes-Benz стадионида жамоа бош мураббийи Фабио Каннаваро иштирокида матбуот анжумани ўтказилди. Бу ўйин осонроқ кечади, фақат ғалабани ўйлаяпмиз, деган у анжуман чоғида.
Ўзбекистон миллий жамоасининг жаҳон чемпионати доирасидаги навбатдаги ўйини Конго жамоасига қарши Ўзбекистон вақти билан 28 июнь куни соат 4:30 да Атланта шаҳрида, Mercedes-Benz стадионида бошланади. Ушбу учрашув аввалида жамоа бош мураббийи матбуот анжумани ўтказди. Фабио Каннаварога кўра, жамоа икки кучли рақиб билан ўйнаб бўлди, энди Конгога қарши ўйин нисбатан осон кечиши керак.
“Эртанги рақибимиз Колумбия, Португалия билан солиштирганда анча осонроқ. Бизга теоритик жиҳатдан бироз енгилроқ бўлади, чунки таркиб бўйича энг кучли жамоадан ўтиб олдик. Ижобий натижа қайд этиш ҳақида ўйлаяпмиз”, деди жамоа бош мураббийи.
Унинг қўшимча қилишича, жаҳон чемпионати аввалидан ўтказилган ўртоқлик ўйинларида ўзини яхши намоён этгани сабаб Абдувоҳид Неъматовни асосий дарвозабон этиб танланган.
“Абдувоҳид Неъматов мен бу ерга келганимдан бери терма жамоа сафида ҳамда ўртоқлик ўйинларида ўзини яхши намоён этган. Шу сабабли мен унга имконият беришга ҳаракат қилдим. Сабаби жаҳон чемпионати шундай мусобақаки, барчага тажриба улашиши керак. Агар Абдувоҳиддек яхши дарвозабоним бўлса, нега бундай фойдаланмаслигим керак”, дейди Каннаваро.
Колумбия ва Португалияга қарши учрашувда 22 та ўйинчи иштирок этган. Фақатгина 4 нафар футболчи ушбу жаҳон чемпионатида ҳали иштирок этмади, яъни дебют қилмади. Булар учинчи дарвозабон Ботирали Эргашев, Авазбек Ўлмасалиев, Умар Эшмуродов ҳамда Жамшид Искандеров.
22 та ўйинчини майдонга тушириш ҳақидаги саволга Каннаваро жавоб бераркан, бу яхши ва барча футболчилар терма жамоада ўйнаб кўрди, Колумбия ва Португалияга қарши, дея таъкидлаган.
Матбуот анжуманидан сўнг жамоа ўйин олдидан машғулотларга йўл олган. Бош мураббий Каннаваро шунингдек, Осиё деганда Иордания, Ироқ, Япония, Австралия каби давлатлар жамоалари каби ўйнаш даражасига чиқиш лозимлигини эслатди.
