Ўтган даврда Иқтисодиётни либераллаштириш, валюта сиёсати ва ташқи савдо тизимини эркинлаштириш бўйича муҳим қарорлар қабул қилинди. Мамлакатда тадбиркорликни қўллаб-қувватлаш, хусусий мулк дахлсизлигини таъминлаш ва бизнес учун қулай шарт-шароитлар яратиш давлат сиёсатининг устувор йўналишига айланди.

Ҳудудларни комплекс ривожлантириш, янги иш ўринлари яратиш ва аҳоли бандлигини таъминлаш мақсадида минглаб инвестиция ва инфратузилма лойиҳалари ҳаётга татбиқ этилди. Рақамли иқтисодиёт ривожланиш босқичига кирди. Камбағалликни қисқартириш ва аҳолининг даромадларини оширишга қаратилган янги механизмлар жорий қилинди.

Албатта, мамлакат иқтисодиётининг бундай шиддат билан тараққий этиши – Ўзбекистоннинг бундан 10 йил олдинги ҳолати ва давлат раҳбарининг қатъий сиёсий иродаси, қабул қилинган муҳим стратегик дастурлар ҳамда уларнинг ижроси билан чамбарчас боғлиқ.

Иқтисодий соҳада самарали меҳнат қилиб келаётган, Олий Мажлис Қонунчилик палатасининг Бюджет ва иқтисодий масалалар қўмитаси раиси, иқтисодиёт фанлари доктори, профессор Шарофиддин Назаровнинг «Эврилиш нуқталари: тарих ва келажак» номли китобини мутолаа қилиш орқали ҳам англаш мумкин.

Бугун, 19 июнь куни Олий Мажлис Қонунчилик палатасида мазкур китобнинг тақдимотига бағишланган маънавий-маърифий тадбир бўлиб ўтди. Унда Қонунчилик палатаси депутатлари, Ўзбекистон фанлар академияси мутасаддилари ва иқтисодчи олимлар, Ёшлар парламенти аъзолари, илмий жамоатчилик вакиллари ҳамда ОАВ ходимлари иштирок этди.

Тақдимот давомида ушбу асар шунчаки ўтмиш воқеаларининг хроникаси ёки қуруқ иқтисодий рақамлар тўплами эмас, балки юртимиз босиб ўтган зиддиятли ва мураккаб йўлнинг холис, танқидий ва илмий нигоҳ билан қилинган таҳлили маҳсули, дея эътироф этилди. Китобнинг марказий фалсафасини, муаллиф тили билан айтганда, «Эврилиш нуқтаси» концепцияси ташкил этиши таъкидланди.

Тадбирда сўз олганлар китобнинг «Эврилиш нуқтаси» жамият ёки давлат ривожланишидаги муҳим бурилиш палласи экани, унда эскича тизим ва инқирозга юз тутган моделдан воз кечиб, тубдан янгиланиш ва юксалишга ўтиш жараёни ёхуд хатоларни тан олмасдан, эскиликни ушлаб қолишга уриниб, таназзулга юз тутиш тўғрисидаги ҳақиқатлар тилга олингани, муаллиф Ўзбекистоннинг яқин ва узоқ тарихини айнан мана шу давр кўзгуси орқали таҳлил қилгани хусусида фикр-мулоҳазалар билдирдилар.

Шунингдек, тақдимотда ушбу рисола орқали муаллиф дастлаб миллий давлатчилигимиз тарихидаги иккита бутунлай фарқли даврни қиёслаши соҳа олимлари томонидан алоҳида қайд этилди.

Биринчиси – очиқлик, илм-фан ва халқаро иқтисодий интеграцияга таянган, минтақани дунёнинг марказига айлантирган Темурийлар Ренессанси. Иккинчиси эса дунёдаги глобал технологик трендларни ва саноат инқилобини пайқамай қолган, ички низолар ва мутаассиблик ботқоғига ботган, натижада геосиёсий изоляция ва мустамлакачиликка юз тутган Темурийлардан кейинги давр. Муаллиф бу икки даврни шунчаки тарих сифатида эсламайди, балки уларни бугунги кунимиз учун теран бир кўзгу сифатида мулоҳаза қилади.

Тақдимотда мазкур китобнинг фақатгина салбий таҳлиллардан иборат эмаслиги, унинг иккинчи, ижобий қисми жамиятимиздаги туб бурилишлар даврига бағишлангани алоҳида таъкидланди. Жумладан, муаллиф 2016 йилни мамлакатимиз тарихидаги янги ва музаффар «Эврилиш нуқтаси» сифатида баҳолайди. Китобнинг «Янги бошқарув фалсафаси» бобида эса «Давлат органлари халққа хизмат қилиши керак», деган эзгу тамойилнинг ҳаётимизга кириб келиши, мажбурий меҳнат занжирларининг узилиши ва сўз эркинлигининг таъминланиши тизимли таҳлил этилган.

Ижтимоий озодлик ортидан иқтисодий озодлик – яъни, кичик бизнес, хусусий мулк ва мулк дахлсизлиги давлатнинг бош устунига айлангани «Тадбиркорлик феномени» бобида чуқур илмий-иқтисодий асослаб берилади.

Рисоладан юртимиз босиб ўтган зиддиятли йўлнинг холис нигоҳ билан қилинган таҳлилий мулоҳазалар ўрин олган бўлиб, унда муаллиф узоқ ва яқин ўтмишимиздаги таназзул сабаблари ва жамиятнинг йўққа чиқарилган имкониятлари ҳақида очиқ фикр юритади. Мустақилликнинг дастлабки йилларидан бошлаб юзага келган парадокслар, иқтисодий сиёсатнинг энг оғриқли нуқталари, келажакда такрорланмаслиги керак бўлган англашга йўналтирилган ўз мулоҳазалари билан ўртоқлашади.

Китобни моҳиятан ўтмишдаги аждодлар нафасини бугунги кун шиддати билан боғлашга бўлган уриниш, дейиш мумкин. Тарихий хотиралардан олинган сабоқлар шунчаки ўтмиш эмас, балки келажакни ёритувчи «маънавий маёқ» сифатида талқин этилади.

Рисолада «Истеъмол бозоридаги «ўйинлар», «Ислоҳотлар имитацияси», «Янги бошқарув фалсафаси» каби муҳим мавзуларга бағишланган таҳлилий фикр-мулоҳазалар ҳам берилган.

Тадбир якунида иштирокчилар ва Олий Мажлис Қонунчилик палатаси кутубхонасига мазкур китоб тўпламлари совға қилинди.