Филология факультетининг фаоллар залида ташкил этилган тадбирда университет раҳбарияти, профессор-ўқитувчилар, вилоят ҳокимлиги вакиллари ҳамда талаба-ёшлар иштирок этди.
Анжуман Ўзбекистонда давлат тилига бўлган эътиборни акс эттирувчи видеоролик намойиши билан бошланди.
Тадбирда Фарғона вилояти ҳокимининг давлат тили масалалари бўйича маслаҳатчиси Соҳибжамол Тонготарова сўзга чиқиб, ҳудудда давлат тилини ривожлантириш ва унинг қўлланиш доирасини кенгайтириш борасида амалга оширилаётган ишлар ҳақида гапирди.
Шунингдек, тилшунос олимлар ва профессор-ўқитувчилар — Филология факультети Тилшунослик кафедраси профессори Алижон Мамажонов ҳамда кафедра доценти Дҳанраж ўз маърузаларида она тилимизнинг илмий-назарий асослари, жозибаси ва халқаро миқёсдаги аҳамияти ҳақида маълумот берди.
Тадбирнинг бадиий қисми иштирокчиларга байрамона кайфият бағишлади. Педагогика-психология ва санъатшунослик факультети талабалари томонидан Алишер Навоий ғазаллари асосида тайёрланган «Ўрмадим» ва «Гулузорим» ашулалари ҳамда мумтоз куйлар ижро этилди.
Шунингдек, иккинчи босқич талабалари Маржона Тўйчиева ва Ойноза Абдуллаева бошчилигида Фурқат ғазали билан бойитилган «Суратинг» қўшиғи барча иштирокчилар томонидан кўтаринки руҳда куйланди.
