Бу борада ўтказилаётган адабий-маърифий тадбирлар миллий адабиёт ривожига хизмат қилиш билан бирга, ижодкорлар ва китобхонлар ўртасидаги мулоқотни янада мустаҳкамламоқда. Ана шундай аҳамиятли анжуманлардан бири жорий йилнинг 3 июль куни Ислом цивилизацияси маркази кутубхонасида бўлиб ўтди.
Ўзбекистон Ёзувчилар уюшмаси ташаббуси билан ташкил этилган тадбирда Ўзбекистонда хизмат кўрсатган маданият ходими, таниқли шоира ва таржимон Фарида Афрўзнинг “Танланган асарлар” тўплами ҳамда “Шуур” китоби кенг жамоатчиликка тақдим этилди.
Миллий адабиётимиз ҳаётидаги муҳим маданий воқеалардан бири сифатида эътироф этилган мазкур анжуманда адабиётшунос олимлар, ижодкорлар, давлат ва жамоат арбоблари, таржимонлар, ёш қаламкашлар, оммавий ахборот воситалари вакиллари ҳамда кенг китобхонлар жамоатчилиги иштирок этди.
Тадбир аввалида Фарида Афрўзнинг ҳаёти ва ижодий фаолияти, миллий адабиёт, таржимачилик ва маънавий-маърифий соҳалар ривожига қўшган муносиб ҳиссасига бағишланган видеолавҳа намойиш этилди.
Анжуманни Ўзбекистон Ёзувчилар уюшмаси раиси биринчи ўринбосари Минҳожиддин Мирзо очиб берди.
Тадбирда Шайх Абдулазиз Мансур, Хуршид Дўстмуҳаммад ҳамда Ботиржон Эргашев сўзга чиқиб, Фарида Афрўз ижодининг замонавий ўзбек адабиётидаги ўзига хос ўрни, унинг шеъриятида инсон қалби кечинмалари, миллий руҳ, эзгулик ғоялари ва ҳаётий-фалсафий мушоҳадалар юксак бадиий маҳорат билан талқин этилганини таъкидладилар. Шунингдек, шоиранинг таржимон сифатида жаҳон адабиётининг сара намуналарини ўзбек китобхонига етказиш йўлидаги самарали фаолияти ҳам алоҳида эътироф этилди.
Тақдимот давомида Фарида Афрўз ўзининг янги китоблари ҳақида сўз юритар экан, уларнинг яратилиши ортида узоқ йиллик меҳнат ва ижодий изланишлар мужассам эканини таъкидлади.
— Бу китоблар — эллик йиллик ижоднинг маҳсули. Китобнинг ҳам тўйи бўлади. Бу жуда ўзига хос тўй. Фарзанд тўққиз ойда дунёга келса, китоблар эллик йиллик меҳнат билан яратилади. Шунинг учун ҳам бугун яқинларим, дўстларим ва китобхонларим билан бирга бўлиш мен учун катта бахт. Шеър ёзиш осон эмас. У илҳом билан туғилади, уни мажбурлаб ёзиш мумкин эмас. Бу — илоҳий неъмат, — деди шоира.
Тадбир иштирокчиларидан бири, Ўзбекистонда хизмат кўрсатган маданият ходими, Маданиятшунослик ва номоддий маданий меросни тадқиқ этиш институти директори, шоир Ботиржон Эргашев Фарида Афрўзнинг нафақат ижодкор, балки инсон сифатидаги фазилатларига ҳам алоҳида тўхталди.
— Фарида опам нафақат дилбар шоира, балки инсоний фазилатлари билан ҳам кўпчиликка намуна. Ижод йўлимнинг бошида мени қўллаб-қувватлаб, “укам” деб қаноти остига олган инсон ҳам айнан Фарида опам бўлганлар. Бугунги ютуқларимда уларнинг меҳри ва ишончи катта ўрин тутади. Умрлари узоқ, ижодлари баракали бўлсин”, — деди Ботиржон Эргашев.
Тадбир доирасида ёш ижодкорлар томонидан шоира асарлари асосида тайёрланган бадиий чиқишлар намойиш этилди. Шунингдек, Фарида Афрўз шеърлари инглиз, рус, турк, озарбайжон, қозоқ, испан ва француз тилларида ўқилиб, унинг ижоди халқаро адабий майдонда ҳам муносиб эътироф этилаётгани яна бир бор намоён бўлди. “Шеър — шуур” адабий мулоқоти иштирокчилар ўртасида мазмунли фикр алмашиш майдонига айланди.
Тадбир якунида Фарида Афрўз китобхонлар билан эркин мулоқот қилди, уларнинг саволларига жавоб берди ҳамда янги китоблардан дастхат ёзиб берди.
Мазкур тақдимот мамлакатимизда китобхонлик маданиятини юксалтириш, миллий адабиётни қўллаб-қувватлаш, ижод аҳлини рағбатлантириш ҳамда бадиий сўзга бўлган юксак эҳтиромнинг яна бир амалий ифодаси сифатида алоҳида аҳамият касб этди.
Зулхумор Акбарова
