Ўзбекистон Республикаси Президенти Шавкат Мирзиёевнинг 2025 йилдаги давлат ва сиёсий фаолияти ҳамда мамлакатимизда амалга оширилган кенг кўламли ислоҳотларнинг мазмун-моҳиятини ёритишга бағишланган «Юрт қайғусида 365 кун» номли китобнинг тантанали тақдимот маросими бўлиб ўтди.
Тадбирда Ўзбекистон Республикаси Фанлар академияси вице-президенти, «Меҳнат шуҳрати» ордени соҳиби, тарих фанлари доктори, профессор Баҳром Абдуҳалимов, «Юрт қайғусида 365 кун» китобининг муҳаррири, «Янги Ўзбекистон» ва «Правда Востока» газеталари таҳририяти бош муҳаррири, Ўзбекистонда хизмат кўрсатган журналист Салим Дониёров, таниқли олимлар, ижодкор зиёлилар, Академия раҳбарияти, профессор-ўқитувчилар, ҳарбий хизматчилар, курсантлар ҳамда оммавий ахборот воситалари вакиллари иштирок этди.
Тадбирни Ўзбекистон Республикаси Фавқулодда вазиятлар вазирлиги Академияси бошлиғининг биринчи ўринбосари, подполковник Фурқатжон Назаров кириш сўзи билан очди. Подполковник Фурқатжон Назаров ўз нутқида Президентимиз Шавкат Мирзиёев раҳбарлигида амалга оширилаётган ислоҳотлар Янги Ўзбекистон тараққиётининг мустаҳкам пойдеворини яратганини алоҳида таъкидлади. У «Юрт қайғусида 365 кун» китоби давлат раҳбарининг халқ манфаатларини таъминлаш, мамлакат тараққиёти ва инсон қадрини улуғлаш йўлида олиб борган фаолиятини тарихий далиллар, ишончли ҳужжатлар ва таҳлилий материаллар асосида ёритувчи муҳим нашр эканини қайд этди.
Тақдимот давомида Ўзбекистон Республикаси Фанлар академияси вице-президенти, тарих фанлари доктори, профессор Баҳром Абдуҳалимов сўзга чиқиб, китоб замонавий Ўзбекистон тарихини ўрганишда муҳим илмий-публицистик манба эканини таъкидлади. Унинг фикрича, нашрда Президентимизнинг халқ билан очиқ мулоқотга асосланган бошқарув тамойили, мамлакатимиз тараққиёти йўлида амалга оширилган кенг кўламли ислоҳотлар ҳамда бунёдкорлик ишлари ҳаққоний ва тизимли равишда ёритилган.
«Юрт қайғусида 365 кун» китобининг муҳаррири, «Янги Ўзбекистон» ва «Правда Востока» газеталари таҳририяти бош муҳаррири, Ўзбекистонда хизмат кўрсатган журналист Салим Дониёров китобни яратиш ғояси кенг китобхонлар жамоатчилиги, зиёлилар ва ўқувчиларнинг таклиф ҳамда мурожаатлари асосида шаклланганини таъкидлади. У муҳаррир сифатида нашрни тайёрлаш жараёнида тарихий холислик, ҳужжатлар ишончлилиги ва фактларнинг аниқлигига устувор аҳамият берилганини қайд этиб, китоб Янги Ўзбекистон тараққиётининг ўзига хос тарихий солномаси сифатида бугунги ва келажак авлод учун қимматли манба бўлиб хизмат қилишини алоҳида таъкидлади.
Тадбир якунида Академия раҳбарияти томонидан фахрий меҳмонларга самимий миннатдорлик билдирилиб, уларга «Академия эсдалик» нишони тантанали равишда топширилди.
Ўз навбатида, меҳмонлар ҳам тадбирнинг юксак савияда ташкил этилгани, Академияда илм-фан, маънавият ва маърифатни ривожлантириш борасида амалга оширилаётган изчил ишлар учун Академия раҳбариятига миннатдорлик билдирдилар. Шунингдек, фахрий меҳмонлар Академиянинг «Академия фахрийлари китоби»га самимий тилаклари, эзгу истаклари ва қимматли фикр-мулоҳазаларини ёзиб қолдирдилар.
Тадбир доирасида соҳага оид, ҳуқуқий, сиёсий ва бадиий китоб ярмаркаси ташкил этилгани иштирокчиларда катта таассуротлар қолдирди.
