Қашқадарё вилоятидаги ЙПХ масканида «Қарши – Тошкент» йўналишида ҳаракатланаётган «Кобальт» автомобили текширилди. Автомашинада йўловчи сифатида кетган, Андижон вилояти Булоқбоши туманида яшовчи 1966 йилда туғилган фуқарога тегишли қўл сумкаси кўздан кечирилганда, сариқ рангли скотч билан ўралган 5 дона ўрамда жами 5 килограмм 32 грамм «гашиш» гиёҳвандлик воситаси аниқланиб, ашёвий далил сифатида расмийлаштириб олинди.

Бошқа бир ҳолатда Бухоро вилояти Ғиждувон туманида яшовчи 1974 йилда туғилган шахс ўз томорқасида 33 туп «каннабис» ўсимлигини етиштириб келгани фош этилди. Шунингдек, унинг хонадонидан 7 килограмм 79 грамм «марихуана» гиёҳвандлик воситаси ҳам мусодара қилинди.

Фарғона вилоятида ўтказилган тезкор тадбирда эса «Андижон – Қўқон» йўналишида ҳаракатланаётган «Ласетти» автомобили тўхтатилди. Текширув давомида унда йўловчи бўлган Қўқон шаҳрида яшовчи 2001 ва 1982 йилларда туғилган фуқароларга тегишли қоплар ичида 1200 дона «Тропикамид» кучли таъсир қилувчи дори воситаси борлиги аниқланди.

Айни вақтда ушбу автомобиль билан кетма-кет ҳаракатланаётган «Спарк» автомобилидаги 1986 йилда туғилган шериги ҳам қўлга олинди. Тезкор тадбир давомида мазкур ноқонуний фаолиятга алоқадор бўлган 1998 ва 1980 йилларда туғилган яна икки нафар фуқаро ушланди. Улардан жами 345 дона «Тропикамид» ҳамда 15 дона «Регапен» дори воситаси ашёвий далил сифатида олинди.

Дастлабки маълумотларга кўра, ушбу шахслар кучли таъсир қилувчи дори воситаларини Қирғиз Республикасидан айланма йўллар орқали олиб кириб, уларни ноқонуний сотиш билан шуғулланиб келган.

Ҳозирда ушбу ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.