Google’нинг ривожланаётган бозорлар бўйича давлат органлари билан алоқалар ва давлат сиёсати вице-президенти Дорон Авни LinkedIn саҳифасида Ўзбекистондаги ўзгаришлар ҳақида фикр билдирди.
Унинг таъкидлашича, жорий йил бошида Ўзбекистон шахсий маълумотларни ҳимоя қилиш соҳасидаги ёндашувини янгилади. Маълумотларни қатъий локализация қилиш ўрнига, мослашувчан ва мувозанатли ёндашув танланди.
Дорон Авни бу ислоҳотларнинг амалий натижаси кўп куттирмаганини қайд этди: Google Pay Ўзбекистонда ишга тушди.
«Ҳукуматлар олдиндан тушунарли ва глобал тизимлар билан ўзаро ишлай оладиган қоидаларни яратса, глобал технологиялар ҳам тез кириб келади», — деб ёзди у.
Google вакили ушбу воқеани Ўзбекистон ва АҚШнинг рақамли модернизацияни жадаллаштириш борасидаги умумий интилишининг мисоли сифатида баҳолади.
Google Pay’нинг Ўзбекистонда ишга туширилиши АҚШ давлат котиби Марко Рубионинг мамлакатга ташрифи ва Самарқанддаги C5+1 вазирлар саммити давомида эълон қилинган эди.
«Ўзбекистон прагматик сиёсат орқали янги имкониятларга йўл очиш мумкинлигини амалда кўрсатмоқда», — деб таъкидлади Дорон Авни.
Саида Мирзиёева жорий йилнинг сентябрь ойида Нью-Йоркда Google вице-президенти Каран Бхатия билан учрашиб, технологик ҳамкорликни кенгайтириш масалаларини муҳокама қилган эди.
«Биз сўнгги йилларда шахсга доир маълумотларни қайта ишлаш ва рақамли тўловлар соҳасидаги қонунчиликни такомиллаштирдик. Бунинг натижасида Ўзбекистонда халқаро тўлов тизимларидан эркин фойдаланиш учун кенг йўл очилмоқда», — деган эди Президент администрацияси раҳбари.
27 октябрь куни Ўзбекистонда Google Pay ва Apple Pay тизимлари тўлақонли ишга тушгани эълон қилинди.
