Қурилиш ва уй-жой коммунал хўжалиги вазирлиги маълумотларига кўра, кўприкнинг узунлиги 321 метр, кенглиги эса 32 метрни ташкил этади. Унда ҳар икки йўналишда учтадан ҳаракатланиш бўлаги, шунингдек, пиёдалар ва велосипедчилар учун алоҳида йўлаклар ташкил этилади.
Маълум қилинишича, кўприк соатига 10,5 мингта автомобилни ўтказиш қувватига эга бўлади.
Иншоот қурилишида 38 метрлик оралиқ балкалардан фойдаланилмоқда. Кўприк таянчлари остида ҳар бири 38 тадан 48 тагача қозиқ ўрнатилиши кўзда тутилган. Бу конструкциянинг мустаҳкамлигини таъминлаш, жумладан, зилзила ва бошқа табиий офатлар таъсирига чидамлилигини оширишга хизмат қилади.
Айни пайтда кўприк таянчларидан бирида қолиплаш ишлари олиб борилмоқда.
Янги Тошкентни барпо этишда нафақат турар жой ва жамоат бинолари, балки йўллар, кўприклар ҳамда муҳандислик-коммуникация тармоқлари каби инфратузилма объектларини ривожлантиришга ҳам алоҳида эътибор қаратилмоқда. Янги кўприк эса шаҳарлар ўртасидаги транспорт алоқасини яхшилашга хизмат қилиши кутилмоқда.
