Баҳодир Аҳмедов, физика-математика фанлари доктори, Ўзбекистон Миллий университетини тамомлаган, кейинчалик Испаниянинг «Гранада» университетида магистратура босқичида таҳсил олган ҳамда Германиянинг «Ахен техника университети»да докторантурани якунлаган.
Меҳнат фаолияти давомида Баҳодир Аҳмедов Тошкентдаги ИНҲА университетида профессор, 2021 йилдан буён эса «Янги Ўзбекистон» университетида профессор ва ўқув ишлари бўйича биринчи проректор сифатида самарали фаолият юритиб келмоқда. 2020 йилда «Шуҳрат» медали билан тақдирлангани ҳам унинг меҳнати ва фидойилигига берилган юксак эътирофдир.
Шунингдек, унинг ташаббуси билан дунёнинг юқори рейтингли олий таълим муассасалари, жумладан «Массачуссетс Технологиялар Институти», «Мюнхен техника университети», «Халифа университети», «Гонг Конг фан ва технологиялар университети» билан ҳамкорлик алоқалари йўлга қўйилди. Бу эса университетнинг халқаро нуфузини ошириш, замонавий таълим дастурларини жорий этиш ва талабалар учун янги имкониятлар яратишда муҳим аҳамият касб этди.
