Замонавий ривожланиш шиддати ҳар бир ҳудуддан эскича ёндашувлардан воз кечиш ва янгича иқтисодий моделга ўтишни талаб этмоқда. Бир пайтлар иқтисодий қийинчиликлар гирдобида қолган, давлат дотацияси ҳисобидан кун кўрган Наманганда бугун амалга оширилаётган ислоҳотлар кўлами шу қадар каттаки, аҳоли ҳаётидаги аниқ ўзгаришлар, янги ишлаб чиқариш қувватлари ва йирик инфратузилма лойиҳалари кундан кунга яхшиланиб, кенгайиб, тараққий этиб бормоқда. Ҳудудда саноат ва экспорт ҳажмининг кескин ошиши, тўғридан тўғри хорижий инвестициялар оқимининг кенгайиши ҳамда аҳолининг тадбиркорлик фаоллиги юқори босқичга кўтарилгани вилоятни нафақат Фарғона водийси, балки бутун мамлакат миқёсидаги етакчи драйверлардан бирига айлантирмоқда.

Шу билан бирга, транспорт-логистика имкониятларини кенгайтириш, рақамли технологиялар ва сунъий интеллект ишланмаларини амалиётга татбиқ қилиш, Наманган халқаро аэропорти негизида замонавий терминал ва карго марказини барпо этиш орқали ҳудуднинг келажакдаги рақобатбардошлигига мустаҳкам пойдевор қўйилмоқда. Энг муҳими, бу жараёнларнинг марказида одамларга муносиб иш ўринлари ва юқори даромад манбаини яратиш, уларнинг турмуш даражасини оширишдек аниқ ва мақсадли вазифалар ётибди.

Барча жабҳаларда юксак салоҳияти ва беадоқ имкониятларини намойиш қилаётган вилоятда кечаётган ана шу ислоҳотларнинг ижтимоий-иқтисодий моҳияти, инвестициявий ва инновацион истиқболлари ҳамда аҳоли фаровонлигини таъминлашга қаратилган устувор режаларни атрофлича ва холис таҳлил қилиш мақсадида “Янги Ўзбекистон” ва “Правда Востока” газеталари бош муҳаррири Салим Дониёров Наманган вилояти ҳокими Шавкат Абдураззоқов билан суҳбат уюштирди.

— Шавкат Шокиржонович, янги ­Ўзбекистонда амалга оширилаётган ислоҳотлар Наманган вилоятида қандай ­ўзгаришларни юзага чиқарди? Вилоят ривожланишида энг катта ютуқ сифатида нималарни қайд этган бўлардингиз?

— Янги Ўзбекистонда олиб борилаётган кенг қамровли ислоҳотлар Наманган вилояти тараққиётида мутлақо янги босқични бошлаб берди. Энг муҳими, ҳудудларни ривожлантиришга оид ёндашув тубдан ўзгарди — ҳар бир туман ва шаҳарнинг иқтисодий салоҳияти, аҳолининг эҳтиёжи ва ташаббуслари асосий мезонга айланди. Бу эса инвестициялар жалб қилиш, янги иш ўринлари яратиш, муҳандислик-коммуникация инфратузилмасини яхшилаш ҳамда тадбиркорликни қўллаб-қувватлашда аниқ натижалар бермоқда. Агар мен энг катта ютуқни қайд этадиган бўлсам, бу — Наманганда иқтисодий фаоллик ва одамларнинг ўз кучи, ташаббуси билан даромад топиш имкониятлари кенгайганидир. Сўнгги йилларда вилоятда минглаб янги корхоналар ташкил этилди, саноат ишлаб чиқариши бир неча баробар ўсди, инвестиция муҳити сезиларли даражада яхшиланди. Бугун Наманган нафақат Фарғона водийси, балки республикада саноат, хизмат кўрсатиш ва тадбиркорликни ривожлантириш бўйича етакчи ҳудудлардан бири сифатида эътироф этилмоқда.

Энг асосийси, барча ислоҳотларнинг марказида инсон манфаати турибди. Биз учун ҳар бир инвестиция лойиҳаси, ҳар бир қурилиш ёки ишлаб чиқариш объекти, аввало, аҳоли фаровонлиги, бандлиги ва ҳаёт сифати яхшиланишига хизмат қилиши керак. Шу тамойилдан келиб чиқиб, Наманган вилоятида бошланган ислоҳотларни янада юқори босқичга олиб чиқиш ва барқарор иқтисодий ўсишни таъминлаш бўйича ишларни изчил давом эттирмоқдамиз.

— Наманган халқаро аэропортининг янги терминали нафақат вилоят, балки бутун Фарғона водийси учун стратегик аҳамиятга эга. Ушбу лойиҳа ҳудуднинг инвестициявий жозибадорлиги, туризм ва экспорт салоҳиятига қандай таъсир кўрсатади?

— Наманган халқаро аэропортининг янги терминали янги Ўзбекистоннинг очиқ иқтисодиёт ва ҳудудларни комплекс ривожлантириш сиёсатида муҳим стратегик лойиҳалардан бири. Ушбу терминал Наманган вилоятининг халқаро транспорт ва логистика имкониятларини сезиларли даражада кенгайтиради, Фарғона водийсининг ташқи дунё билан алоқаларини янада мустаҳкамлайди.

Қиймати 150 миллион долларлик “Наманган xалқаро аэропорти негизида xалқаро терминал барпо этиш” ҳамда қиймати 100 миллион долларлик мазкур “Халқаро аэропорт негизида карго логистика xизмат кўрсатиш марказини ташкил этиш” лойиҳаларида қурилиш-ободонлаштириш ишлари жадал суръатларда олиб борилмоқда.

Лойиҳани фойдаланишга топшириш натижасида аэропорт қиёфаси тубдан ўзгариши баробарида йўловчи ташиш қуввати 2,5 баробар ошади. Шунингдек, хизматлар сифати ҳам жаҳон стандартларига мос бўлади. Кунига 50 тонна юкни қайта ишлаш имконияти яратилиб, ушбу мажмуа орқали 90 та мамлакатга экспорт қилинади ва водийда ягона карго тизими йўлга қўйилади.

Энг аввало, бу лойиҳа вилоятнинг инвестициявий жозибадорлигини оширади. Чунки ҳар қандай инвестор ҳудуднинг транспорт инфратузилмасига алоҳида эътибор қаратади. Замонавий аэропорт хорижий инвесторлар ва бизнес вакилларининг ҳудудга келиши учун қулай шарт-шароит яратади, янги инвестиция лойиҳаларини амалга оширишга хизмат қилади.

Иккинчидан, туризм соҳасида янги имкониятлар очилади. Наманган бой тарихий мероси, гўзал табиати, зиёратгоҳлари ва ўзига хос маданий анъаналари билан катта туристик салоҳиятга эга. Янги терминал халқаро авиақатновлар географиясини кенгайтириш орқали хорижлик сайёҳлар оқимини кўпайтиришга, ички туризмни ривожлантиришга ва хизматлар соҳасида янги иш ўринлари яратилишига замин бўлади.

Учинчидан, экспорт имкониятлари ҳам янги босқичга чиқади. Наманганда тўқимачилик, тайёр кийим-кечак, мева-сабзавот ва бошқа рақобатбардош маҳсулотлар ишлаб чиқарилади. Замонавий аэропорт тезкор логистика имкониятларини кенгайтириб, экспорт қилувчи корхоналар учун ташқи бозорларга чиқишни янада осонлаштиради. Бу эса маҳсулотларнинг рақобатбардошлигини ошириш ва экспорт ҳажмини кўпайтиришда қўл келади.

— Наманганда илм-фан, стартаплар ва инновацияларни ривожлантириш бўйича қандай янги ташаббуслар режалаштирилган?

— Бугунги кунда ахборот технологиялари, хусусан, сунъий интеллект ҳудудлар тараққиётини белгилаб берувчи энг муҳим омиллардан бирига айланди. Биз учун бу соҳа вилоят иқтисодиётини янги босқичга олиб чиқувчи, ёшларимиз учун юқори даромадли иш ўринлари яратувчи ва бошқарув самарадорлигини оширувчи стратегик устувор йўналишдир.

Ушбу соҳа мамлакатимизда жадал суръатлар билан ривожланмоқда ва давлат сиёсатининг марказий масалаларидан бирига айланган. Бунинг яққол исботи — Президентимизнинг жорий йилнинг 23 июль куни вилоятимизга ташрифи чоғида Наманган давлат техника университетида ташкил этилган Сунъий интеллект лабораторияси ҳамда “Наманган ақлли шаҳар вазиятлар маркази” фаолияти билан яқиндан танишганидир. Мазкур мажмуа Наманган вилояти ҳокимлиги, Рақамли технологиялар вазирлиги ҳамда Асакабанк ҳамкорлигида барпо этилди.

Алоҳида таъкидлаш жоизки, лаборатория энг сўнгги русумдаги сунъий интеллект технологиялари — юқори қувватли серверлар ва замонавий ҳисоблаш машиналари билан тўлиқ жиҳозланган. Бу ерда катта маълумотлар таҳлили (Big Data), рақамли эгизак (Digital Twin), геоахборот тизимлари (GIS) ва интеллектуал қарор қабул қилиш воситаларидан кенг фойдаланилади. Марказ сунъий интеллект ва робототехника, энергетика, транспорт ва логистика, архитектура ва қурилиш, рақамли иқтисодиёт, қишлоқ хўжалиги ва экология каби 10 дан ортиқ йўналишни ягона илмий-амалий муҳитда бирлаштирди. Биз ушбу лабораторияга вилоятдаги барча инновацион лойиҳалар учун бошланғич нуқта — таълим, илмий тадқиқот, технологиялар трансфери ва стартапларни ривожлантиришни ўзида бирлаштирган замонавий экотизим сифатида қараймиз.

Ташриф давомида давлатимиз раҳбарига лаборатория негизида ишлаб чиқилаётган бир қатор лойиҳалар тақдим этилди ва улар Президентимиз томонидан маъқулланиб, эътирофга сазовор бўлди. Хусусан, хотин-қизларимизни етакчилик кўникмаларига ўқитишга қаратилган “Digital Imkon” ижтимоий лойиҳаси, сунъий интеллект ва сунъий йўлдош тасвирлари асосида қишлоқ хўжалигини ривожлантиришга йўналтирилган “AgroAI” лойиҳаси ҳамда миллий ва маданий меросимизни асраб-авайлашга хизмат қилувчи GameDev йўналишидаги лойиҳалар шулар жумласидандир. Мамнуният билан айтишим мумкинки, ушбу лойиҳаларнинг барчаси бўйича амалий ишлар аллақачон бошлаб юборилган.

Шу ўринда Ўзбекистон Республикаси Президентининг 2026 йил 11 февралдаги “Стартапларни қўллаб-қувватлашнинг комплекс экотизимини жорий этиш чора-тадбирлари тўғрисида”ги қарори аҳамиятини алоҳида таъкидламоқчиман. Мазкур қарорга мувофиқ ҳар йили “Энг инновацион ғоя” республика танлови ўтказилиб, ғолибларга 100 миллион сўм миқдорида грант ажратилади, “Олийгоҳлар — стартаплар генератори” дастури доирасида ҳар бир лойиҳага 20 минг долларгача инвестиция киритиш имконияти яратилади, “Рақамли стартаплар” дастури иштирокчиларига эса АT-парк резиденти мақоми берилади. Айнан сунъий интеллект лабораторияси ушбу қарор ижросида вилоятимиздаги стартаплар учун бошланғич майдонча вазифасини бажаради. Бу ерда иқтидорли ёшларимиз ва талабаларимиз ўз ғояларини профессор-ўқитувчилар ва тажрибали мутахассислар кўмагида амалий лойиҳаларга айлантириш, замонавий ускуналарда синовдан ўтказиш ҳамда инвесторларга тақдим этиш имкониятига эга бўлади. Ишончим комилки, яратилаётган ушбу шароитлар туфайли Наманган вилояти яқин келажакда мамлакатимизнинг сунъий интеллект ва инновациялар соҳасидаги етакчи ҳудудларидан бирига айланади.

— 2030 йилга назар ташлайдиган бўлсак, сиз вилоятни қайси кўрсаткичлар бўйича мамлакатнинг етакчи ҳудудларидан бири сифатида кўришни мақсад қилгансиз? Бу мақсадга эришиш учун энг асосий омил нима?

— Биз 2030 йилгача бўлган тараққиёт ­стратегиямизда Наманган вилоятини иқтисодий қудрати, инвестициявий жозибадорлиги, саноатлашув даражаси, экспорт салоҳияти, замонавий инфратузилмаси ва аҳоли турмуш сифати бўйича мамлакатнинг етакчи ҳудудлари қаторида кўришни мақсад қилганмиз. Бунинг учун олдимизга аниқ вазифалар қўйилган. Аввало, юқори қўшилган қиймат яратадиган саноат тармоқларини кенгайтириш, маҳаллий хомашёни чуқур қайта ишлаш, экспортбоп маҳсулотлар ишлаб чиқариш ҳажмини янада оширишга алоҳида эътибор қаратамиз. Рақамли иқтисодиётни ривожлантириш, логистика имкониятларини кенгайтириш, кичик бизнес ва хусусий тадбиркорликни қўллаб-қувватлаш ҳам устувор вазифаларимиздан ҳисобланади.

Бироқ менинг назаримда, энг асосий кўрсаткич иқтисодий рақамлар эмас, балки инсон капиталидир. Агар аҳолимиз билимли, замонавий касб-ҳунарга эга, тадбиркорлик руҳи кучли ва ўз келажагига ишончи мустаҳкам бўлса, бошқа барча натижаларга ҳам албатта эришамиз. Шу боис, таълим сифати, соғлиқни сақлаш, ёшлар бандлиги, хотин-қизларнинг иқтисодий фаоллиги ва аҳолининг даромадларини оширишга қаратилган ишлар бизнинг доимий эътиборимиз марказида туради.

Энг асосий омил эса Президентимиз раҳбарлигида олиб борилаётган ислоҳотларни ҳудудларда самарали амалга ошириш, давлат идоралари, тадбиркорлар ва аҳолининг ўзаро ҳамжиҳатлиги ҳамда масъулиятидир. Чунки тараққиёт жамиятнинг барча қатламлари бир мақсад йўлида ҳаракат қилгандагина барқарор бўлади.

Ишонаманки, Наманганнинг меҳнаткаш ва ташаббускор халқи, бой иқтисодий салоҳияти ҳамда кенг кўламли ислоҳотлар натижасида 2030 йилга бориб вилоятимиз нафақат мамлакатимизда, балки Марказий Осиёда ҳам инвестиция, саноат, экспорт ва инновацион ривожланиш бўйича рақобатбардош ҳудудлардан бирига айланади. Бу бизнинг энг катта мақсадимиз ва шу йўлда барча имкониятларни сафарбар этамиз.

— Бугун ҳудудлар ўртасида инвестиция учун рақобат кучаймоқда. Инвесторлар айнан Наманганни танлаши учун қандай шароитлар яратилмоқда?

— Бугунги кунда инвестиция учун рақобат жуда кучли. Энди инвесторни фақат имтиёзлар билан эмас, балки ишончли муҳит, замонавий инфратузилма, тезкор бошқарув ва кафолатланган ҳамкорлик билан жалб қилиш мумкин. Шу нуқтаи назардан, Наманганда инвестор учун энг қулай ишбилармонлик муҳитини яратишни устувор вазифа сифатида белгилаганмиз.

Вилоятга жалб қилинган хорижий инвестициялар ҳажми 2019 йилдаги 184 миллион доллардан 2025 йилда 4 миллиард долларга етказилиб, 21,7 баробарга ошди. Фаолият юритаётган қўшма корхоналар сони 228 тадан

415 тага кўпайиб, қарийб 2 баробар ўсди. Амалга оширилган инвестиция лойиҳалари доирасида яратилган янги иш ўринлари сони 14,5 мингдан 45 мингга етди.

Белгиланган вазифаларга мувофиқ, 2026 йилда вилоятда хорижий инвестициялар ҳажмини 5 миллиард долларга, экспорт кўрсаткичларини эса 1 миллиард долларга етказиш бўйича олдимизга режа қўйганмиз.

Шунингдек, 2026-2028 йиллар давомида умумий қиймати 12,4 миллиард долларлик 297 та лойиҳа портфели шакллантирилган. Бунинг негизида:

— Хитой Халқ Республикасидан қиймати 6,2 миллиард долларлик 76 та лойиҳа доирасида 2,9 миллиард доллар;

— Туркия ва Озарбайжондан қиймати 1,5 миллиард долларлик 21 та лойиҳа доирасида 702 миллион доллар;

— Россия Федерациясидан қиймати 916 миллион долларлик 23 та лойиҳа доирасида 405 миллион доллар;

— Япониядан қиймати 640 миллион долларлик 5 та лойиҳа доирасида 327 миллион доллар;

— Австриядан қиймати 96 миллион долларлик 3 та лойиҳа доирасида 35 миллион доллар ўзлаштирилади.

Аввало, ҳар бир инвестиция лойиҳаси билан манзилли ишлаш тизими йўлга қўйилган. Инвесторга ер ажратиш, муҳандислик-коммуникация тармоқларига улаш, рухсатномаларни расмийлаштириш ва бошқа ташкилий масалаларда давлат идоралари томонидан комплекс кўмак кўрсатилмоқда. Бизнинг ёндашувимиз оддий: инвестор вақтни ҳужжатбозликка эмас, бизнесини ривожлантиришга сарфлаши керак.

Иккинчидан, Наманганнинг ўзига хос рақобат устунликлари мавжуд. Бу, энг аввало, меҳнатсевар ва малакали кадрлар, қулай географик жойлашув, ривожланаётган транспорт-логистика инфратузилмаси, эркин иқтисодий ва саноат зоналари, шунингдек, катта ички ва минтақавий бозорларга яқинлигидир. Шу билан бирга, Президентимиз ташаббуси билан тадбиркорликни қўллаб-қувватлаш, хусусий мулк дахлсизлигини таъминлаш ва инвесторлар ҳуқуқларини ҳимоя қилиш бўйича яратилган ҳуқуқий кафолатлар Наманганда ҳам тўлиқ амал қилмоқда. Биз ҳар бир инвесторни фақат сармоядор эмас, балки ҳудуд тараққиётидаги стратегик ҳамкор сифатида қабул қиламиз. Энг муҳими, инвестициянинг самараси фақат жалб қилинган маблағ билан эмас, балки яратилган иш ўринлари, янги технологиялар, экспорт ҳажми ва аҳоли фаровонлиги билан баҳоланади. Шу боис, биз учун ҳар бир лойиҳа инсон манфаатига хизмат қилиши муҳим. Наманган бугун имкониятлар ҳудудига айланмоқда. Ишонаманки, очиқ мулоқот, ишончли ҳамкорлик ва қулай бизнес муҳити туфайли вилоятимиз яқин ­йилларда мамлакатимизда инвестициялар жалб қилиш бўйича энг жозибадор ҳудудлардан бири сифатида ўз мавқеини янада мустаҳкамлайди.

— Кейинги йилларда саноат тез ривожланмоқда. Аммо бу экологик барқарорлик билан уйғун бўлиши ҳам муҳим. Вилоятда “яшил иқтисодиёт” тамойилларини жорий этиш бўйича қандай ишлар қилиняпти?

— Бугунги кунда иқтисодий ўсиш ва экологик барқарорлик бир-бирини тўлдирувчи муҳим омиллар ҳисобланади. Президентимиз томонидан белгилаб берилган “яшил тараққиёт” сиёсати доирасида Наманган вилоятида ҳам “яшил иқтисодиёт” тамойилларини ҳаётга кенг татбиқ этиш бўйича тизимли ишлар олиб борилмоқда.

Аввало, янги саноат лойиҳаларини амалга татбиқ этишда экологик талабларга қатъий риоя қилиш асосий мезонлардан бири ҳисобланади. Замонавий, энергия тежовчи ва экологик хавфсиз технологияларни жорий этаётган корхоналарга устуворлик бериляпти. Бу эса табиий ресурслардан оқилона фойдаланиш ва атроф-муҳитга таъсирни камайтиришга хизмат қилмоқда. Шу билан бирга, қайта тикланувчи энергия манбаларидан фойдаланиш кўлами ҳам кенгаймоқда. Қуёш энергетикаси, энергиятежамкор ускуналардан фойдаланиш, давлат муассасалари ва ишлаб чиқариш объектларида энергия самарадорлигини ошириш бўйича аниқ дастурлар амалга оширилмоқда.

Экологик барқарорликни таъминлашда кўкаламзорлаштириш ишларига ҳам алоҳида эътибор қаратилмоқда. “Яшил макон” умуммиллий лойиҳаси доирасида вилоятимизда миллионлаб дарахт ва буталар экилиб, янги яшил ҳудудлар ташкил этиляпти. Бу нафақат экологик муҳитни яхшилаш, балки иқлим ўзгариши таъсирини юмшатиш ва аҳоли учун соғлом яшаш муҳитини яратишга хизмат қилмоқда.

Бундан ташқари, чиқиндиларни саралаш ва қайта ишлаш, сув ресурсларидан самарали фойдаланиш, қишлоқ хўжалигида сув тежовчи технологияларни кенг жорий этиш каби йўналишлар ҳам доимий эътиборимиз марказида турибди. Иқтисодий тараққиётнинг ҳақиқий самараси фақат ишлаб чиқариш ҳажми билан эмас, балки инсон саломатлиги, тоза атроф-муҳит ва келажак авлодлар учун сақлаб қолинадиган табиий бойликлар билан ўлчанади. Шу боис, Наманганда ҳар бир янги инвестиция ва ҳар бир янги саноат лойиҳаси иқтисодий манфаат билан бир қаторда экологик масъулият тамойили асосида амалга оширилишига қатъий эътибор қаратамиз.

— Сиз, ҳоким сифатида қайси соҳада қарорлар қабул қилишда қийналасиз? Шундай вазиятларда қандай тамойилга таянасиз?

— Ҳокимлик фаолиятида осон қарорнинг ўзи бўлмайди. Чунки ҳар бир қарор минглаб инсонларнинг ҳаёти, турмуш сифати ва келажагига бевосита таъсир кўрсатади. Шунинг учун энг қийин қарорлар, одатда, аҳоли манфаати билан иқтисодий эҳтиёжлар ўртасида мувозанатни таъминлаш талаб этиладиган масалаларда қабул қилинади.

Масалан, йирик инвестиция лойиҳаларини амалга ошириш, шаҳарсозлик ва инфратузилмани ривожлантириш, ер ресурсларидан оқилона фойдаланиш ёки бюджет маблағларини устувор йўналишларга тақсимлаш каби қарорлар чуқур таҳлил ва катта масъулиятни талаб қилади. Бу жараёнда бир томоннинг манфаатини эмас, балки бутун жамият манфаатини ҳисобга олиш муҳим.

Мен учун қарор қабул қилишда энг асосий тамойил — қонунийлик, адолат ва инсон манфаатидир. Президентимиз томонидан илгари сурилган “Инсон қадри учун” деган эзгу ғоя нафақат давлат сиёсатининг, балки ҳар бир раҳбарнинг кундалик фаолияти учун ҳам бош мезон бўлиши керак. Агар қабул қилинаётган қарор одамларнинг ҳаёт сифатини яхшилашга, янги имкониятлар яратишга ва ҳудуднинг барқарор ривожланишига хизмат қилса, демак, бу тўғри қарор ҳисобланади.

Шу билан бирга, қарорлар якка тартибда эмас, балки мутахассислар хулосаси, жамоатчилик фикри, тадбиркорлар ва фуқароларнинг таклифлари асосида шакллантирилишига алоҳида аҳамият берамиз. Бугунги замон раҳбардан нафақат талабчанлик, балки очиқ мулоқот, халқни эшитиш ва асосли қарор қабул қилиш маданиятини ҳам талаб этади.

Мен доимо бир фикрга амал қиламан: раҳбарнинг энг катта мезони — халқ ишончи. Ана шу ишончни оқлаш, ҳар бир қарорда адолат ва масъулиятни устувор қўйиш мен учун энг муҳим вазифадир. Зеро, бугун қабул қилаётган қарорларимиз фақат бугунги кун эмас, балки Наманганнинг эртанги тараққиётини ҳам белгилаб беради.

Эксклюзив саволлар

— Агар бугун Наманган ёшларига битта асосий маслаҳат бериш имконияти бўлса, уларга нима деган бўлардингиз?

— Биламан, жуда кўп такрорланади, лекин бу ҳақиқат: ўн йил олдин бугунги ёшлар учун яратилган имкониятларнинг ярми ҳам йўқ эди. Шу боис, уларга ҳавас қиламан, жавлон уриб ишлаш, ўқиш учун ҳамма шароит бор. Нима дердим, ўзингизга ишонинг, билим олишдан ва янгилик яратишдан ҳеч қачон тўхтаманг. Катта орзу қилинг, катта мақсадлар қўйинг ва уларга эришиш учун тинмай меҳнат қилинг. Чунки янги Ўзбекистоннинг эртанги куни, Наманганнинг келажаги айнан сизларнинг билимингиз, ғайратингиз ва фидойилигингизга боғлиқ.

Бугунги дунёда энг катта бойлик бу — билим, касб-ҳунар ва замонавий кўникмалар. Табиий ресурслар чекланган бўлиши мумкин, аммо инсоннинг билими, тафаккури ва салоҳиятининг чегараси йўқ. Шунинг учун ҳар бир ёш чет тилларини ўрганишга, рақамли технологияларни эгаллашга, замонавий касб-ҳунар соҳиби бўлишга ва доимий ўз устида ишлашга интилиши керак.

Мен Наманган ёшларида катта салоҳиятни кўраман. Улар ташаббускор, меҳнатсевар ва ўз олдига катта мақсадлар қўя олади. Бугун давлатимиз томонидан таълим, тадбиркорлик, инновация ва ёшлар бандлигини қўллаб-қувватлаш учун яратилаётган имкониятлардан оқилона фойдаланиш ҳар бир ёшнинг энг муҳим вазифасидир.

Яна бир муҳим жиҳат — Ватанга муҳаббат. Ватанни севиш фақат оҳорли жумлалар билан эмас, балки ҳалол меҳнат, юксак масъулият ва ўз соҳасининг етук мутахассиси бўлиш орқали намоён бўлади. Ким қайси соҳада фаолият юритмасин, агар у ўз ишини сидқидилдан бажарса, юртимиз тараққиётига муносиб ҳисса қўшган бўлади.

— Вилоятдаги қайси масала сизни энг кўп хавотирга солади?

— Ҳар бир раҳбар учун энг катта масъулият бу — одамларнинг дарди ва муаммосини ҳис қилиш, уларни ўз вақтида ҳал этиш. Шу маънода, мени энг кўп ўйлантирадиган ва доимий эътиборимда бўлган масала, бу аҳоли, айниқса, ёшлар учун муносиб иш ўринлари яратиш, уларнинг даромадларини ошириш ва фаровон ҳаёт шароитларини таъминлашдир.

Наманган аҳолиси меҳнатсеварлиги, тадбиркорлиги ва яратувчанлиги билан ажралиб туради. Бизда катта инсон капитали ва улкан салоҳият бор. Эндиги вазифа — ана шу салоҳиятни тўлиқ ишга солиш, ҳар бир оилага барқарор даромад манбасини яратиш учун янги имкониятлар эшигини очишдан иборат.

Шу билан бирга, жадал ривожланиш жараёнида сифатли таълим, замонавий тиббий хизматлар, ичимлик сув, йўл ва коммунал инфратузилма каби аҳоли кундалик ҳаётига бевосита таъсир қиладиган масалалар ҳам доимий назоратимизда. Чунки иқтисодий ўсишнинг асосий мақсади — статистикани эмас, аввало, инсонлар ҳаётини яхшилашдир.

Албатта, муаммолар йўқ эмас. Лекин энг муҳими, уларни очиқ тан олиш, халқ билан бирга ечим излаш ва натижа учун масъулиятни зиммамизга юклашдир. Биз ҳар бир масалани “одамлар бугун қандай яшаяпти, эртага қандай яшаши керак?” деган савол асосида баҳолаймиз. Чунки ҳокимлик фаолиятининг бош мезони, бу аҳолининг ишончи ва розилигидир.

— Ҳоким сифатида ҳали ечими топилмаган қайси муаммони ўзингиз учун энг катта вазифа деб биласиз?

— Ҳар бир ҳудуднинг ривожланиш жараёнида ечимини кутаётган масалалар бўлади. Раҳбар учун энг муҳими муаммони тўғри белгилаш, сабабларини чуқур ўрганиш ва босқичма-босқич ҳал этиш. Мен ўзим учун энг катта вазифалардан бири сифатида аҳолига муносиб даромад манбалари яратиш, меҳнат бозори талабларига мос янги иш ўринларини кўпайтириш ва инсонларнинг ҳаёт сифатини янада яхшилаш масаласини белгилаган бўлар эдим. Чунки ҳар қандай ислоҳотнинг энг катта самараси бу — оиладаги фаровонлик, инсоннинг ўз меҳнати билан муносиб ҳаёт кечира олишида намоён бўлади.

Шаҳар ва қишлоқларимизда инфратузилмани янада яхшилаш, аҳолига зарур коммунал хизматлар кўрсатиш, таълим ва тиббиёт соҳаларида сифат кўрсаткичларини ошириш ҳам доимий эътиборимизда. Чунки ҳудуд тараққиёти фақат иқтисодий кўрсаткичлар билан эмас, балки инсоннинг кундалик ҳаётидаги ўзгаришлар билан баҳоланади.

Бу вазифаларни амалга оширишда биз халқ билан очиқ мулоқотга, жамоатчилик фикрига ва аниқ таҳлилларга таянамиз. Ҳар бир туман ва маҳалладаги муаммонинг аниқ манзили, масъули ва ечими бўлиши керак деган тамойил асосида ишлаяпмиз. Наманганнинг энг катта бойлиги — унинг одамлари. Шунинг учун барча саъй-ҳаракатларимизни инсон қадри ва халқ фаровонлигига қаратиб давом эттирамиз.

— Президентимиз ташрифидан кейин шахсан ўз иш услубингизда нималарни ўзгартирдингиз?

— Президентимизнинг Наманган вилоятига ташрифи давомида билдирилган фикрлар, берилган топшириқлар ва белгиланган устувор йўналишлар биз учун фаолиятимизни янада такомиллаштиришга катта туртки бўлди. Шахсан мен ўз иш услубимда, аввало, масалаларга янада чуқурроқ таҳлил ва натижадорлик нуқтаи назаридан ёндашишни кучайтирдим. Илгари ҳам халқ билан мулоқот, жойларга чиқиб ўрганиш асосий иш услубимиз эди. Бугун эса ҳар бир қарорнинг аниқ натижаси, ҳар бир лойиҳанинг одамлар ҳаётига таъсири ва ҳар бир топшириқнинг ижроси бўйича янада қатъий талаб қўйяпмиз.

Шунингдек, раҳбарлик услубида жамоа билан ишлашнинг аҳамиятини янада оширдик. Чунки бугунги мураккаб ва тез ўзгараётган шароитда биргина раҳбарнинг қарори эмас, балки малакали мутахассислар, тадбиркорлар, фаол фуқаролар ва жамоатчиликнинг фикри уйғунлашган ҳолдагина самарали натижа беради. Президентимиз доимо таъкидлаб келаётганидек, раҳбарнинг асосий вазифаси халққа хизмат қилиш, одамларни рози этиш ва натижа кўрсатишдир. Шу нуқтаи назардан, мен ҳам ўз фаолиятимда “қанча иш қилинди?” деган савол билан бирга “бу иш ўзи одамларга қандай наф берди?” деган мезонни биринчи ўринга қўйишга ҳаракат қиламан.

Бугунги кунда асосий мақсадимиз, берилган имкониятлардан самарали фойдаланиб, Наманган вилоятини янада тараққий этган, аҳолиси фаровон ва инвестициявий салоҳияти юқори ҳудудга айлантиришдир. Бу йўлда эса доимий изланиш, масъулият ва халқ ишончига муносиб бўлиш биз учун энг муҳим мезон бўлиб қолади.

— Шавкат Шокиржонович, мазмунли суҳбатингиз учун раҳмат!