Натижада фуқаролар иш жойини ўзгартиришдан олдин Миграция агентлигининг Корея Республикасидаги ваколатхонасидан алоҳида розилик олиши ҳақидаги талаб бекор қилинди.
Шунингдек, мазкур талабга риоя этилмаган ҳолатларда жарима қўллашни назарда тутувчи банд ҳам уч томонлама шартномадан чиқариб ташланди.
Аввал ушбу талаблар фуқароларнинг Корея Республикасида ноқонуний мақомга ўтиб кетишининг олдини олиш, улар билан доимий алоқани таъминлаш ҳамда зарур ҳолатларда ижтимоий, ҳуқуқий ва моддий кўмак кўрсатиш мақсадида киритилган эди.
Корея Республикасидаги иш берувчилар ва нодавлат нотижорат ташкилотлари билан ўтказилган музокаралар, шунингдек, фуқаролардан келиб тушган мурожаатлар таҳлили асосида мазкур талаблар қайта кўриб чиқилди.
Эндиликда E-9 визаси асосида ишлаётган фуқаролар иш жойини ўзгартириш учун Миграция агентлигининг алоҳида розилигини олиши шарт эмас. Улар амалдаги тартиб ва қонунчилик асосида иш берувчи билан меҳнат шартномасини бекор қилиб, янги иш берувчи билан меҳнат муносабатларига киришиши мумкин.
Бироқ мазкур ўзгариш Корея Республикасининг E-9 визаси бўйича белгиланган қонунчилик талабларини ўзгартирмайди.
Хусусан, E-9 визаси асосида ишлаётган фуқаро иш берувчи билан меҳнат шартномасини бекор қилганидан сўнг 1 ой ичида иш изловчи сифатида давлат рўйхатидан ўтиши ва 90 кун ичида янги ишга жойлашиши лозим.
Акс ҳолда у Корея Республикаси ҳудудини тарк этиши талаб этилади. Белгиланган муддатда ишга жойлашмаган ва мамлакат ҳудудини тарк этмаган фуқаро ноқонуний мақомга ўтиши мумкин.
Бундай ҳолатда Корея Республикаси қонунчилигига мувофиқ жарима, депортация қилиниши ёки мамлакатга қайта киришига тақиқ қўйилиши мумкин.
Шу билан бирга, уч томонлама шартномада Корея Республикасида ноқонуний мақомда қолганлик учун жарима қўллаш банди сақлаб қолинди.
