Ваколатхона IT Park Uzbekistan ва Global Digital Innovation Network (GDIN) ҳамкорлигида Сеонгнам шаҳридаги Pangyo Technovalley технологик кластери ҳудудида ташкил этилди.
Корея Республикасига хизмат сафари доирасида Рақамли технологиялар вазири Шерзод Шерматов ва IT Park Uzbekistan ижрочи директори Жаҳонгир Ражабов GDIN президенти ва бош директори JongKap Kim билан музокаралар ўтказди.
Маросимда Данияр Атаджанов IT Park Uzbekistan’нинг Корея Республикасидаги расмий вакили этиб тайинлангани маълум қилинди.
Тадбир доирасида IT Park Uzbekistan ва GDIN ўртасида Англашув меморандуми имзоланди.
Ҳужжат стартапларни қўллаб-қувватлаш, технологик компанияларнинг халқаро миқёсда кенгайишига кўмаклашиш ҳамда Ўзбекистон ва Корея инновацион экотизимлари ўртасидаги амалий ҳамкорлик механизмларини ривожлантиришни назарда тутади.
Ҳамкорлик доирасида қўшма корхоналар ташкил этиш, компанияларни хорижий бозорларга олиб чиқиш дастурларини амалга ошириш, икки мамлакат стартаплари ўртасида алмашинув дастурларини йўлга қўйиш, қўшма пилот лойиҳаларни ишга тушириш, шунингдек, сунъий интеллект ва R&D йўналишларида ҳамкорликни ривожлантириш режалаштирилган.
Ўзбек стартаплари Корея бозорида синовдан ўтказилади
Томонлар Korea–Uzbekistan Global PoC Program доирасида ўзбек стартаплари учун биринчи Proof of Concept (PoC) лойиҳасини ишга тушириш масаласига ҳам алоҳида эътибор қаратди.
Мазкур дастур стартапларга ўз технологик ечимларини Корея бозорида синовдан ўтказиш, потенциал ҳамкорлар ва буюртмачилардан фикр олиш, маҳсулотга бўлган талабни баҳолаш ҳамда кейинги босқичда кенгайишга тайёргарлик кўриш имконини беради.
Дастлабки босқичда учта қўшма корхона ва битта PoC дастурини тайёрлаш кўзда тутилган. Уларни ишга тушириш 2027 йил январь ойига режалаштирилган.
Шунингдек, IT Park Uzbekistan GDIN ҳамкорлик тармоғига қўшилади. Бу икки мамлакат технологик компаниялари ўртасида тўғридан-тўғри алоқаларни кенгайтириш имконини беради.
Тадбир доирасида Кореянинг технологик, инвестициявий, таълим ва бизнес ҳамжамияти вакиллари иштирокида networking-сессияси ҳам ўтказилди.
Унда KOIIA, Inpro, KPMG, Ezcure, Korea IT Consulting, KDDI Korea, Neural D, Yonsei University, ARTYZ Korea Inc., WISESTONE, Prototie ва SaferZone вакиллари иштирок этди.
Томонлар компанияларнинг икки мамлакат бозорларига чиқиши, қўшма лойиҳаларни амалга ошириш ҳамда технологик компаниялар ўртасида тўғридан-тўғри бизнес алоқаларини ривожлантириш масалаларини муҳокама қилди.
GDIN 3 мингдан ортиқ технологик компанияни қўллаб-қувватлаган
Global Digital Innovation Network 2013 йилда ташкил этилган бўлиб, Корея ва бошқа мамлакатларнинг инновацион технологик компаниялари ўртасида халқаро ҳамкорликни ривожлантириш ҳамда уларнинг глобал бозорларга чиқишига кўмаклашади.
Маълум қилинишича, фаолияти давомида GDIN 3 мингдан ортиқ технологик компанияни қўллаб-қувватлаган, 160 та халқаро ҳамкорлик алоқасини ривожлантиришга кўмаклашган ва 20 мингдан ортиқ консалтинг хизмати кўрсатган.
Шунингдек, ташкилот компанияларга қарийб 3,6 миллиард доллар миқдорида инвестиция жалб қилишга ёрдам берган.
Янги Liaison ваколатхонаси ва имзоланган меморандум ўзбек стартапларининг Корея бозорига чиқиши, корейс компанияларини Ўзбекистонга жалб этиш, қўшма корхоналарни ишга тушириш ҳамда PoC дастурлари доирасида технологик ечимларни синовдан ўтказиш учун амалий асос яратади.
