Камбағалликни қисқартириш ва бандлик вазирлигининг маълум қилишича, Меҳнат кодексининг 401 ва 402-моддаларига кўра, айрим тоифадаги ота-оналар ҳар йили қўшимча таътил олиш ҳуқуқига эга.
Ушбу ҳуқуқдан 12 ёшга тўлмаган икки ва ундан ортиқ фарзанди ёки 16 ёшга тўлмаган ногиронлиги бўлган фарзанди бор ота-оналардан бири, шунингдек, ота-она ўрнини босувчи шахс фойдаланиши мумкин.
Қонунчиликка кўра, уларга ҳар йили камида 4 календарь кун ҳақ тўланадиган қўшимча таътил берилади. Бундан ташқари, ота-оналардан бирининг хоҳишига кўра, ҳар йили 14 календарь кунгача иш ҳақи сақланмайдиган таътил ҳам берилиши мумкин.
Бу таътилларни йиллик меҳнат таътилига қўшиб ёки иш берувчи билан келишган ҳолда алоҳида олиш мумкин. Шунингдек, уларни тўлиқ ёки қисмларга бўлиб фойдаланишга рухсат этилади.
Муҳим жиҳат: қўшимча таътиллар фақат тегишли иш йили давомида берилади. Фойдаланилмаган таътил кунлари кейинги иш йилига кўчирилмайди. Ҳақ тўланадиган қўшимча таътил эса пулли компенсация билан алмаштирилмайди.
Демак, фарзандлари билан бирга вақт ўтказишни истаган ва қонунда белгиланган тоифага кирадиган ота-оналар иш берувчига мурожаат қилиб, ушбу қўшимча таътиллардан фойдаланишлари мумкин.
