Ҳамюртларимиз пара велоспорт, пара дзюдо, пара таэквондо, пара сузиш ва пара енгил атлетика бўйича мусобақаларда олтин, кумуш ва бронза медалларини қўлга киритди.
Олтин медаллар
Пара велотрек бўйича эркаклар ўртасида 3 км масофага якка таъқиб пойгаси финалида Бобур Тоштемиров жанубий кореялик рақибини мағлуб этиб, 3:41.263 натижа билан олтин медални қўлга киритди. Шунингдек, у Пара Осиё ўйинлари рекордини ўрнатди. Бу Ўзбекистон тарихида пара велоспорт бўйича мазкур мусобақаларда қўлга киритилган илк олтин медал бўлди.
Пара сузиш бўйича аёллар ўртасида S5 классида 50 метрга эркин усулда сузиш баҳсларида Лолахон Қодирова 37,88 сония натижа билан маррага биринчи бўлиб етиб келди. У олтин медал билан бирга Осиё рекордини ҳам ўрнатди.
Кумуш медаллар
Пара дзюдо бўйича аёллар ўртасида J1 классида 60 кггача вазн тоифасида Улжон Амриева финалда хитойлик Ши Ижие билан беллашиб, кумуш медални қўлга киритди. Маълумот учун, у Ханчжоу–2022 Пара Осиё ўйинларида ҳам бронза медалига сазовор бўлган.
Пара дзюдо бўйича эркаклар ўртасида J2 классида 70 кггача вазн тоифасида Кемран Нуриллаев финалга қадар етиб борди. Ҳал қилувчи баҳсда у қозоғистонлик Ибрагим Нурмаханулага қарши кураш олиб бориб, мусобақани кумуш медал билан якунлади.
Пара таэквондо бўйича эркаклар ўртасида K44 классида 58 кггача вазн тоифасида Фаёзбек Валижонов финалда Хитой Тайпейи вакилига 0:2 ҳисобида имкониятни бой бериб, кумуш медалга эга бўлди.
Аёллар ўртасида 52 кггача вазн тоифасида иштирок этган Умида Мамаражабова ҳам финалда мўғулистонлик рақибасига 0:2 ҳисобида мағлуб бўлиб, кумуш медални қўлга киритди.
Пара енгил атлетика бўйича эркаклар ўртасида T47 классида узунликка сакраш баҳсларида Омадбек Ҳасанов 6,99 метр натижа билан иккинчи ўринни эгаллади.
Бронза медаллар
Пара дзюдо бўйича аёллар ўртасида J1 классида 52 кггача вазн тоифасида Бону Бабаева индонезиялик Новиа Ларассатини мағлуб этиб, бронза медалини қўлга киритди.
Шунингдек, J1 классида 60 кггача вазн тоифасида Фотима Тўирова бронза медали учун кечган баҳсда қозоғистонлик рақибасини 100:0 ҳисобида мағлуб этди.
Эркаклар ўртасида J1 классида 70 кггача вазн тоифасида Иброҳимжон Акбаров ўзбекистонлик Қосим Сафарқуловни мағлуб этиб, бронза медалига сазовор бўлди.
Пара таэквондо бўйича аёллар ўртасида 47 кггача вазн тоифасида Қизлархон Исомиддинова япониялик рақибасини 2:0 ҳисобида мағлуб этиб, бронза медалини қўлга киритди.
