Янги тартиб 2026/2027 ўқув йилидан бошлаб амал қилади.
Магистратура дастурлари қанча муддат давом этади?
Магистрлар:
— ишлаб чиқариш (амалий) дастурига йўналтирилган — камида 1 йил;
— илмий-педагогик дастурга йўналтирилган — камида 2 йил муддатда тайёрланади.
Таълим қандай ташкил этилади?
Магистратурада таълим:
— кундузги;
— кечки;
— масофавий шаклларда ташкил этилиши мумкин.
Амалий дастурга йўналтирилган магистратурада талабалар умумий курслар бўйича бирлашган маърузалар орқали назарий билим олади ҳамда мутахассисликка мос ташкилотларда амалиёт ўтайди.
Илмий-педагогик дастурга йўналтирилган магистратурада эса назарий билимлар билан бир қаторда фундаментал ва амалий илмий-тадқиқот ишлари ҳамда илмий-ижодий ишлар амалга оширилади.
Битирувчилар учун қандай талаблар белгиланади?
Амалий дастурга йўналтирилган магистратура битирувчилари мутахассислик хусусиятидан келиб чиқиб:
— лойиҳа иши;
— конструкторлик лойиҳаси;
— стартап лойиҳаси;
— рационализаторлик ғояси;
— амалий-ижодий асар
ёки бошқа турдаги ишни тайёрлайди ва ҳимоя қилади.
Илмий-педагогик дастурга йўналтирилган магистратура битирувчилари эса магистрлик диссертациясини тайёрлайди ва ҳимоя қилади.
Магистрлик диссертациясига қўйиладиган янги талаблар:
— илмий раҳбар хулосаси тақдим этилади;
— плагиатга йўл қўйилмаганини тасдиқловчи маълумотнома ёки сертификат тақдим этилади;
— диссертация “Яширин эксперт тақризи”дан ўтказилади.
Шунингдек, магистрлик диссертациясининг мавзуси, қисқача аннотацияси ва ҳимоя куни олий таълим ташкилотининг расмий веб-сайтида эълон қилинади.
Яна қандай имкониятлар яратилади?
Магистрларни иш берувчи ташкилотлар талаблари асосида мақсадли тайёрлаш йўлга қўйилади.
Магистрлик диссертацияларининг ҳимояси эса илмий тадқиқот хусусиятидан келиб чиқиб:
— олий таълим ташкилотида;
— Фанлар академиясида;
— тегишли тармоқ илмий-тадқиқот ташкилотлари ёки ишлаб чиқариш корхоналарида
ташкил этилиши мумкин.
Бундан ташқари, олий таълим ташкилотларининг ўзаро келишувига кўра, икки нафар талаба ҳамкорлигида, фанлараро боғлиқлик асосида магистрлик диссертациясини тайёрлашга рухсат этилади.
Илмий мақола эълон қилган магистрлар ҳам рағбатлантирилади.
2026/2027 ўқув йилидан бошлаб ўқиш даврида Scopus ёки Web of Science маълумотлар базаларида индексланувчи журналларда мақола эълон қилган магистратура талабаларини белгиланган тартибда рағбатлантириб борилади.
