Қабул жараёни 1 июльдан 30 июлгача my.edu.uz платформаси орқали амалга оширилади.
Магистратура мутахассисликларига қабул ҳар йили 1 июлдан 30 июльгача (шу куни ҳам) давом этади. Талабгорлар my.edu.uz платформаси орқали онлайн рўйхатдан ўтиб, ҳужжат топшириши мумкин.
Амалдаги тартибга кўра, магистратура босқичига ҳужжат топширишда қуйидаги ҳужжатлар талаб этилади:
— олий маълумот тўғрисидаги ҳужжат (диплом) ёки дипломдан кўчирма ҳамда унинг иловаси;
— хорижий тилни билиш даражасини тасдиқловчи миллий ёки халқаро сертификат.
Бунда 2020/2021-ўқув йилидан бошлаб олий таълим муассасалари томонидан берилган диплом маълумотлари Вазирликнинг HEMIS ахборот тизимида автоматик шакллантирилиши сабабли ушбу тоифадаги битирувчилардан диплом ва унинг иловасини платформага юклаш талаб этилмайди.
Магистратура мутахассисликларига қабул учун қуйидаги даражадаги хорижий тил сертификати талаб этилади:
— хорижий тиллар йўналишлари бўйича — камида C1;
— гуманитар фанлар, биологик ва турдош фанлар, математика ва статистика, бизнес ва бошқарув, ҳуқуқ, хизмат кўрсатиш, ижтимоий ва хулқ-атворга мансуб фанлар, журналистика ва ахборот, ахборот-коммуникация технологиялари таълим соҳалари бўйича — камида B2;
— бошқа таълим соҳалари ҳамда маданият ва спорт мутахассисликлари бўйича — камида B1.
Магистратура босқичи учун қайси йўналишларга қайси даражадаги сертификат талаб этилиши ҳақида батафсил маълумот билан қуйидаги ҳавола орқали танишиш мумкин.
Шунингдек, кўриш, эшитиш ва нутқида нуқсони бўйича I ва II гуруҳ ногиронлиги бўлган шахслар магистратурага қабул қилинишда хорижий тил сертификатини тақдим этиши шарт эмас.
Кўзи ожиз абитуриентларнинг бакалавриат дипломи бўйича ўртача кўрсаткичи 100 баллик тизимда 71 баллдан юқори ёки 5 баллик тизимда “4” ва ундан юқори бўлса, улар қўшимча давлат гранти асосида магистратурага қабул қилинади.
Бундан ташқари, “Cоллеге Боард” ташкилоти томонидан ўтказиладиган SAT халқаро имтиҳонидан 1200 ва ундан юқори натижа олган абитуриентлар сертификат берилган фанга мос ҳамда тамомлаган бакалавриат йўналишига турдош магистратура мутахассисликларига қўшимча давлат гранти асосида қабул қилинади.
Магистратурага давлат гранти ва тўлов-контракт асосида қабул абитуриентларнинг бакалавриат дипломи бўйича ўртача баллари кетма-кетлигига кўра амалга оширилади.
Ариза топшириш жараёни қуйидаги босқичларда амалга оширилади:
тизимдан рўйхатдан ўтиш ва ариза топшириш;
диплом ҳамда хорижий тил сертификати маълумотларини тасдиқлаш;
аризани қабул қилиш ва мутахассислик мослигини текшириш.
Магистратурага қабул бўйича турдош олий таълим йўналишлари рўйхати билан қуйидаги ҳавола орқали танишишингиз мумкин.
Президентнинг 2026 йил 10 апрелдаги ПФ–58-сон Фармонига кўра, 2027/2028 ўқув йилидан бошлаб давлат олий таълим ташкилотлари магистратурасига қабул қилишда янги тизим жорий этилади.
Унга кўра:
– магистратурага ўқишга қабул қилишда хорижий тилни билиш даражасини белгиловчи миллий ёки халқаро сертификатга эга бўлиш талабини сақлаб қолиш;
– олий таълим ташкилотларига тегишли ихтисослик фанлари бўйича қўшимча имтиҳон ўтказиш ваколатини бериш;
– қўшимча имтиҳон шакли, синовлар дастури ҳамда баҳолаш мезонлари олий таълим ташкилоти томонидан мустақил тасдиқланиши назарда тутилган.
