Президентимизнинг “Прагматик мулоқот — барқарор келажак сари йўл” шиори остида ўтган 29-Петербург халқаро иқтисодий форумининг ялпи йиғилиши ва Тошкент инвестиция форумида иштирок этиб, нутқ сўзлагани, Чирчиқ шаҳрига ташрифи, қатор хорижий давлат ва ҳукумат раҳбарлари, нуфузли халқаро делегацияларни қабул қилгани каби катта аҳамиятли воқеаларни иқтисодий йўналишлар қаторида тилга олиш мумкин.
Шунингдек, ойнинг дастлабки куни маданият ва санъат ходимлари билан соҳани янада ривожлантириш бўйича келгусидаги устувор вазифаларга бағишланган учрашув, Наманганда ўтган мақом фестивалидаги иштирок, Андижон шаҳрининг “Туркий дунёнинг маданият пойтахти” деб эълон қилиниши доирасида халқаро тадбир, Матбуот ва оммавий ахборот воситалари ходимлари куни тадбирлари ва табриги, Ёшлар куни муносабати билан давлатимиз раҳбари ва ёшлар учрашуви каби муҳим воқеликлар эса маънавиятга қаратилгани билан аҳамиятли.
Шу ўринда мамлакатимиз етакчиси 2024 йил 20 ноябрь куни Олий Мажлис Қонунчилик палатасининг йиғилишида айтган машҳур иқтибосни келтириб ўтиш мақсадга мувофиқ бўлса керак: “Бизнинг иккита ўқ томиримиз, иккита таянч устунимиз бор: бири — иқтисодиёт, бири — маънавиятдир. Маънавий буюк халқ — иқтисодий томондан ҳам буюк бўлади”.
I
1 июнь куни Халқаро конгресс марказида маданият ва санъат соҳаси вакиллари билан учрашув чоғида илгари сурилган ташаббуслар, тақдим этилган янги имконият ва имтиёзлар соҳада янги даврни бошлаб берди. Давлатимиз раҳбарининг шу йил 28 майдаги фармони билан маданият, санъат ва адабиёт соҳалари ходимларидан бир гуруҳи давлат мукофотлари билан тақдирланди.
Учрашув аввалида ушбу мукофотларни тантанали топшириш маросими бўлиб ўтди. Тақдирланганлар орасида узоқ йиллар самарали меҳнат қилиб, халқимизнинг маданий, бадиий ва интеллектуал салоҳиятини юксалтиришга улкан ҳисса қўшган ёзувчи ва шоирлар, хонанда ва созандалар, рақс усталари, опера ижрочилари ва бастакорлар, театр, кино ва цирк санъати намояндалари, бахшилар ва аскиячилар, ҳунарманд ва рассомлар, маданий мерос, музей ва кутубхона ходимлари, устоз ва мураббийлар борлиги барчамизга фахр бағишлаши эътироф этилди.
— Қайси миллатнинг адабиёти бой, мусиқаси юракка яқин, театри ҳаётий, киноси таъсирчан, санъати жозибадор бўлса, ўша халқнинг овози дунёда баланд эшитилади, — деди Президентимиз.
Янги Ўзбекистонни барпо этиш йўлида инсон қалбини тарбиялайдиган катта маънавий макон яратилаётгани, бу борада зиёлилар, ёзувчи ва шоирлар, маданият ва санъат намояндалари, креатив соҳа вакилларининг ўрни беқиёс экани таъкидланди.
Давлатимиз раҳбари мукофотланганларни бутун халқимиз номидан самимий табриклаб, юксак эътироф уларни янги ижодий ютуқларга илҳомлантиришига ишонч билдирди. Мукофотланганлар юксак ҳурмат ва эътибор, маданият ривожи ва ижодкорларга яратилаётган кенг шароитлар учун миннатдорлик билдирди.
Шундан сўнг Президентимиз маданият ва санъат соҳаси вакиллари билан мулоқот қилди. Маданият ва санъат халқ маънавияти, жамият тафаккури ва ёшлар тарбиясида беқиёс ўрин тутишини таъкидлади. Айниқса, ҳозиргидай техник тараққиёт ва мураккаб сиёсий жараёнлар фонида бу янада долзарблик касб этмоқда. Инсон онги ва қалбини эгаллаш учун чегара кесиб ўтиш шарт бўлмай қолди. Ана шундай шароитда китоб, театр, кино, мусиқа ва адабиёт жамиятнинг маънавий иммунитетини мустаҳкамлайдиган энг таъсирчан воситалар экани қайд этилди.
— Бугун дунёда қандай таҳликали ҳолат, қарама-қаршилик ва низолар рўй бераётганини кўриб турибмиз. Бундай вазиятда биз учун миллий бирлик ва ҳамжиҳатлик ҳар қачонгидан ҳам муҳим. Ишончим комил, бу борада сизлар энг олдинги сафда туриб, чинакам ватанпарварлик, миллатга садоқат ва фидойилик фазилатларингиз билан ёшларимизга, бутун халқимизга намуна бўласизлар, — деди Президентимиз.
Мулоқот давомида айтилган жуда кўплаб таклиф, илгари сурилган ташаббус ва муҳокама қилинган масалалар учрашувнинг эртаси куни давлат раҳбари имзолаган “Маданият, санъат ва адабиёт соҳаларини янада ривожлантириш бўйича кенг кўламли чора-тадбирлар тўғрисида”ги фармонда тўлиқ аксини топди.
Ижодкорларга муносиб шарт-шароитлар яратиш ҳамда хусусий сектор иштирокини янада кенгайтиришга қаратилган ҳужжат соҳада янги даврни бошлаб бергани билан аҳамиятли бўлди.
* * *
Наманган вилояти Давлатобод туманидаги Янги Ўзбекистон боғида III Халқаро мақом санъати анжуманининг тантанали очилиш маросими бўлиб ўтди. 80 дан ортиқ хорижий мамлакатнинг маданият ва санъат вакиллари қатнашган маросимда Президентимиз иштирок этиб, нутқ сўзлади.
Давлатимиз раҳбари ушбу нуфузли анжуман хусусида фикр билдираркан, “Санъат — қалбларни бирлаштирадиган, одамларга эзгулик улашадиган маънавият кўпригидир, деб бежиз айтилмаган. Шу маънода, юртимизда доимий тус олган ушбу анжуман — мақом санъатининг умумбашарий нуфузини оширишга хизмат қилаётган жаҳон саҳнасига айланиб бормоқда”, деди.
Чиндан ҳам, мақом санъати шунчаки куй, оҳанг ва ижро маҳорати эмас, балки халқимизнинг маънавий қудрати, юксак илмий салоҳиятининг том маънодаги олий мақоми. Ушбу санъат асрлар оша тўпланган тажриба, чуқур илмий изланиш ва бетакрор истеъдод эгаларининг меҳнати самараси ҳамдир.
Президентимиз қайд этганидек, бугун нафақат мақом ижрочилиги, балки унинг назарий асослари ҳам чуқур ўрганилмоқда. Мақом санъатининг назарий, тарихий ва фалсафий масалаларини ўрганадиган махсус илмий кенгашлар фаолияти янги босқичга олиб чиқилмоқда. Соҳада юксак билим ва малакага эга кадрларни тарбиялаш вазифасига алоҳида эътибор қаратиляпти. Мамлакатимиз етакчиси ушбу ишларни янги босқичга олиб чиқиш мақсадида янги Тошкентда муҳташам Мақом марказини барпо этишга киришилгани ва ушбу масканни Дунё мақом маркази деб номлаш ва унинг ҳузурида Халқаро мақом академиясини ташкил этиш таклифини билдирди.
* * *
Давлатимиз раҳбари Андижон шаҳрининг “Туркий дунёнинг маданият пойтахти” деб эълон қилиниши доирасидаги халқаро тадбирлар иштирокчиларига табрик йўллади. Унда Андижон шаҳрининг бундай юксак шарафга муносиб кўрилганини Ўзбекистоннинг бой тарихи, маданий-маънавий мероси, юртимизнинг туркий маданият ривожига қўшган бебаҳо ҳиссаси, мамлакатимизда олиб борилаётган кенг кўламли ислоҳотларнинг халқаро миқёсдаги яна бир эътирофи экани урғуланди.
Бундан ташқари, Президентимиз 29 июнь куни Биринчи Туркология қурултойининг 100 йиллигига бағишланган халқаро конгресс қатнашчиларини қутлади. “Бундан бир аср муқаддам, 1926 йилда Боку шаҳрида ўтказилган биринчи Туркология қурултойи туркий халқларнинг илм-фани ва маданий ҳаёти ривожида янги даврни бошлаб берган катта тарихий воқеа бўлган эди. Мазкур қурултойда 11 нафар таниқли ўзбек зиёлиси иштирок этганини биз ҳамиша фахр билан эсга оламиз”, дейилади табрикда.
* * *
Эркин ва масъулиятли, халқчил журналистика жамият ва давлат ривожланишининг зарур шартларидан бири. Қалам аҳли учун байрам — 27 июнь санаси арафасида давлатимиз раҳбарининг “Матбуот ва оммавий ахборот воситалари ходимлари куни муносабати билан соҳа ходимларидан бир гуруҳини мукофотлаш тўғрисида”ги фармони эълон қилинди.
Мамлакатимизда сўз ва матбуот эркинлигини ривожлантириш, халқимизнинг ахборот соҳасидаги конституциявий ҳуқуқларини таъминлаш, давлат ва жамият бошқарувида очиқлик ва ошкоралик тамойилларини мустаҳкамлашга қўшаётган муносиб ҳиссаси, янги Ўзбекистондаги демократик ислоҳотлар, янгиланиш жараёнлари ва эришилаётган ютуқларни кенг ёритишдаги катта хизматлари, ёш авлодни Ватанга муҳаббат ва садоқат, умуминсоний қадриятларга ҳурмат руҳида тарбиялаш борасидаги самарали фаолияти ҳамда ижтимоий ҳаётдаги фаол иштироки учун бир гуруҳ соҳа вакиллари давлатимизнинг юксак мукофотлари билан тақдирланди.
Президентимиз касб байрами муносабати билан Матбуот ва оммавий ахборот воситалари ходимларига табрик йўллади. Табрикда келтирилган “Мен сизларни — юксак билим ва салоҳиятга эга, ватанпарвар барча журналистларни ўзим учун доимий маслакдош, жонкуяр дўст деб билишимни яна бир бор изҳор этаман”, деган эътироф қалам аҳлининг зиммасида залворли масъулият борлигини англатади. Унинг замирида катта ишонч, улкан даъват мужассам.
Табрикда, шунингдек, оммавий ахборот воситалари ходимлари фаолияти учун имкониятларни янада кенгайтириш, уларнинг ҳуқуқ ва манфаатлари ҳимоясини кучайтириш, касб маҳорати ва малакасини ошириш, жумладан, ижтимоий ҳимоясини таъминлаш, меҳнатини рағбатлантириш, соғлиғини мустаҳкамлаш ва яшаш шароитларини яхшилашга қаратилган янги чора-тадбирлар амалга оширилиши маълум қилинди.
* * *
Мамлакатимизда миллий ўзликни англаш, бой тарихий-маънавий меросимизни чуқур ўрганиш, улуғ алломаларимиз илмий меросини халқаро миқёсда кенг тарғиб этишга алоҳида эътибор қаратилмоқда. Ўзбекистондаги Ислом цивилизацияси маркази айни шу йўналишда миллий ва халқаро аҳамиятга эга замонавий маданий-маърифий платформа сифатида шаклланмоқда.
10 июнь куни Президентимиз Ўзбекистондаги Ислом цивилизацияси маркази фаолияти натижалари ва уни янада ривожлантириш режалари юзасидан тақдимот билан танишди. Ўтган даврда Марказ томонидан амалга оширилган ишлар ҳақида ахборот берилди.
Ой боши ҳолатига кўра, Марказга ярим миллион нафар маҳаллий аҳоли ва хорижликлар келган. Кунлик ташриф буюрувчилар сони ўртача 6 мингни ташкил этмоқда. Шу даврда муассасага 150 дан ортиқ хорижий делегация ва 2 мингдан зиёд хорижий меҳмонлар ташриф буюрган.
Мажмуа таркибида Болалар музейи, Имом Бухорий инновацион музейи фаолияти йўлга қўйилди. Илмий ва инновацион йўналишда 810 та лойиҳа амалга оширилган. Маданий меросни қайтариш ва фондларни бойитиш мақсадида жами мингдан зиёд артефакт Ўзбекистонга қайтарилди.
Марказ кутубхона фонди ҳам бойитилмоқда. Ҳозирги кунда фонд таркибида 3 мингдан ортиқ нодир нашр мавжуд. Фонд рақамлаштирилмоқда, электрон чиплар ўрнатилмоқда.
Тақдимотда Марказни янада ривожлантириш бўйича келгуси режалар ҳам кўриб чиқилди.
II
Ўзбекистон Республикаси Президенти Шавкат Мирзиёев Россия Федерацияси Президенти Владимир Путиннинг таклифига биноан 4-5 июнь кунлари амалий ташриф билан Санкт-Петербург шаҳрида бўлди ва “Прагматик мулоқот — барқарор келажак сари йўл” шиори остида ўтган 29-Петербург халқаро иқтисодий форумининг ялпи йиғилишида иштирок этди ҳамда нутқ сўзлади.
Жаҳон иқтисодиётида чуқур таркибий ўзгаришлар кечаётган ҳозирги шароитда Петербург халқаро иқтисодий форуми нафақат ишбилармонлик мулоқоти майдони, балки савдо, инвестициялар, саноат кооперацияси, рақамлаштириш, кадрлар тайёрлаш ва инсон капиталини ривожлантириш соҳаларида амалий ечимлар ишлаб чиқиладиган муҳим платформадир.
Ўзбекистон етакчиси жаҳон иқтисодиётидаги вазият, Ўзбекистон — Россия иқтисодий ҳамкорлигини ривожлантириш истиқболлари борасидаги фикрлари билан ўртоқлашди, шунингдек, мамлакатимизни ривожлантиришнинг бугунги устувор йўналишларига тўхталиб ўтди. Нутқда транспорт йўналишларининг ўзгариши, янги ишлаб чиқариш занжирларининг шаклланиши, замонавий технологик платформаларнинг пайдо бўлиши ва сунъий интеллектнинг кенг жорий этилиши билан дунёда кечаётган чуқур трансформация жараёнларига баҳо берилди.
— Рақобат нафақат бозорлар ва табиий ресурслар учун курашда намоён бўлмоқда, балки технологиялар, логистика ва инфратузилма соҳаларида ҳам унинг таъсири сезилмоқда, — деди Шавкат Мирзиёев.
Давлатимиз раҳбари Ўзбекистон — Россия стратегик шериклик ва иттифоқчилик муносабатларининг асосий йўналишларини таҳлил қилиб, савдо-иқтисодий ҳамкорлик, ҳудудлараро алоқалар, саноат кооперацияси ҳамда энергетика соҳасидаги шериклик сифат жиҳатидан янги босқичга кўтарилганини алоҳида қайд этди.
Ташриф дастурида Россия Федерацияси Президенти Владимир Путин билан учрашув ҳамда юртимизда биринчи интеграциялашган атом электр станцияси қурилишини бошлаш маросими бўлиб ўтди.
* * *
Президентимиз 17 июнь куни V Тошкент халқаро инвестиция форумининг ялпи мажлисида нутқ сўзлади. Форум 100 дан ортиқ мамлакатдан 10 мингдан зиёд делегат ва иштирокчиларни бир жойда жамлади. Бу, унинг халқаро нуфузи тобора ортиб бораётгани ҳамда янги Ўзбекистонда амалга оширилаётган ислоҳотларга халқаро ҳамжамиятнинг ишончи мустаҳкамланаётганини яна бир бор тасдиқлади.
Давлатимиз раҳбари Ўзбекистон халқаро инвесторлар билан тенг ҳуқуқли ва ўзаро манфаатли шериклик учун доимо очиқ эканини таъкидлади. Жаҳон иқтисодиётида шиддатли трансформация жараёнлари кечаётган ва рақобат кучайиб бораётган шароитда тадбиркорларнинг ҳуқуқ ва эркинликларини ҳимоя қилиш, барқарор иқтисодий ўсиш ва кенг имкониятларни таъминлашга қодир бўлган мамлакатларга сармоя киритишга интилиш тобора ортиб бораётгани кўрсатиб ўтилди.
Бу борада Ўзбекистонда изчил амалга оширилаётган ислоҳотлар аниқ натижалар бермоқда. Ўтган йили мамлакат иқтисодиёти 7,7 фоизга ўсди, жорий йилда эса ялпи ички маҳсулот ҳажми 180 миллиард доллардан ортиши кутилмоқда. Жалб қилинган инвестициялар ҳажми 43 миллиард долларга етди.
Жорий йилги форум “Инвестициявий барқарорлик: янги марралар ва янги шериклик” мавзусига бағишланди. Давлатимиз раҳбари инвестиция муҳитининг барқарор ривожланиши мамлакатнинг узоқ муддатли мақсадларига эришишнинг муҳим шарти эканини таъкидлади. Бу борада инвестициявий ҳамкорликни янада чуқурлаштириш ва ишбилармонлик фаолиятини юритиш учун замонавий экотизим яратиш бўйича устувор йўналишлар белгиланди.
Якунда Президентимиз мамлакатимизга катта ишонч ва ғоялар билан келаётган хорижий сармоядорларга янги Ўзбекистон эшиклари ҳамиша очиқлигини айтди.
— Тошкент инвестиция руҳи барчангизни мамлакатимизга доим чорлаб туришига, умумий муваффақият рамзига айланишига ишонаман. Юртимизнинг гўзал табиати, бетакрор маданияти ва олийжаноб халқимизнинг меҳмондўст қалби эса дўстлигимизни мустаҳкамлаш учун ўзига хос инвестиция бўлишига аминман, — деди давлатимиз раҳбари.
* * *
Хорижий инвесторлар кенгашининг навбатдаги ялпи йиғилишида давлатимиз раҳбари сўзга чиқиб, сўнгги йилларда Президент ҳузуридаги кенгаш амалий ислоҳотлар майдонига айланиб, мамлакатимиз ва жаҳон инвестиция ҳамжамияти ўртасидаги ишончли кўприк сифатида ўз мавқеини мустаҳкамлаганини таъкидлади.
Кенгаш мустақил ассоциация мақомини олиб, мамлакат иқтисодиётининг 23 та тармоғида фаолият юритувчи 85 та компанияни бирлаштирди. Ижроия қўмитаси таркибига Европа тикланиш ва тараққиёт банки, Осиё тараққиёт банки ҳамда Халқаро молия корпорацияси киради.
Норматив-ҳуқуқий база изчил такомиллаштирилгани ҳамкорликнинг муҳим амалий натижаларидан бири бўлди. Кенгаш аъзоларининг таклифларидан келиб чиқиб, Солиқ кодексига ўзгартиришлар киритилди, молиявий тартибга солиш ва ҳисоб юритишнинг айрим тартиб-таомиллари соддалаштирилди, халқаро молиявий ҳисобот стандартларини қўллайдиган хорижий компаниялар учун бир қатор мажбурий талаблар бекор қилинди. Шу билан бирга, миллий қонунчиликни халқаро амалиётга янада яқинлаштириш бўйича ишлар давом этмоқда.
Президентимиз кенгаш ишбилармонларнинг ташаббуслари давлат сиёсатида ўз амалий ифодасини топадиган самарали очиқ мулоқот майдони бўлиб хизмат қилаётганини таъкидлади. Шу боис, халқаро инвесторлар билан тўғридан тўғри ҳамкорликни сақлаб қолиш ҳамда қайта алоқа механизмларини янада такомиллаштириш муҳим эканига алоҳида урғу берилди.
Йиғилиш якунида барча таклифларни умумлаштириб, ягона “йўл харитаси”ни ишлаб чиқиш, амалга ошириш муддатлари ва назорат механизмларини аниқ белгилаш топширилди.
Шунингдек, Президентимиз мазкур тадбирлар доирасида мамлакатимизга ташриф буюрган қатор давлатларнинг Бош вазир ва ҳукумат раҳбарлари, жаҳоннинг етакчи сиёсатчи, молиявий институт ҳамда компания етакчилари, йирик сармоядорларни қабул қилди.
* * *
Мамлакатимиз етакчиси 2 июнь куни “Чирчиқ” кимё-индустриал технопаркидаги корхоналар фаолияти билан танишди, кимё саноатини жадал ривожлантириш ва ҳудудларда инвестиция лойиҳаларини амалга ошириш бўйича вазифалар юзасидан йиғилиш ўтказди.
Йиғилишда таъкидланганидек, сўнгги йилларда иқтисодиётимиз жадал ривожланиб, саноат тармоқларида 3 минг турдаги янги маҳсулотлар ишлаб чиқариш йўлга қўйилди. Бундан 9-10 йил аввал мамлакатимизда кимё маҳсулотларининг асосий қисмини минерал ўғитлар ташкил қилган. Кейинги йилларда соҳага 8 миллиард 300 миллион доллар инвестиция киритилиб, 87 та йирик қувват ишга туширилди.
60 дан зиёд турдаги юқори қўшилган қийматли янги маҳсулотлар ишлаб чиқариш ўзлаштирилди. Бу орқали иқтисодиёт тармоқларида минглаб янги турдаги маҳсулотларни ишлаб чиқариш учун зарур хомашё базаси яратилди. Натижада соҳада экспорт 3 карра ўсди, ишчилар сони 50 минг нафардан ошди.
Шу билан бирга, тармоқда ҳали ишга солинмаган имкониятлар кўплиги кўрсатиб ўтилди. Сўнгги тўққиз йилда республика саноати ўртача 6,3 фоизга ўсган бўлса, кимё саноатида бу кўрсаткич 3 фоизга ҳам етмаган. Кимё маҳсулотлари импорти 4 баробар ошиб, йилига 4,5 миллиард долларга етган.
“Ўзкимёсаноат” акциядорлик жамияти асосан ўз тизимидаги йирик корхоналар билан чекланиб қолаётгани, соҳадаги 5 мингдан ортиқ корхона билан тизимли ишлаш, уларнинг муаммо ва таклифларини эшитиш сустлиги кўрсатиб ўтилди. Йиғилишда маҳсулотлар таркибини ўзгартириш, қўшилган қийматни ошириш ва энергия сарфини камайтириш масалаларига алоҳида эътибор қаратилди.
Шунингдек минерал ўғитлар бозоридаги имкониятлар ҳам таҳлил қилинди. Давлатимиз раҳбари белгилаб олинган катта марраларга эришиш учун соҳани илмий асосланган ва замонавий ёндашувлар асосида бошқариш зарурлигини таъкидлади. Шу муносабат билан “Ўзкимёсаноат”ни трансформация қилиш бўйича мутасаддиларга тегишли топшириқлар берилди.
* * *
Мамлакатимизда ҳудудларни замонавий технологиялар асосида ривожлантириш, давлат бошқаруви ва хизматлар кўрсатиш тизимини рақамлаштириш, сунъий интеллект имкониятларидан кенг фойдаланиш бўйича изчил ишлар амалга оширилмоқда.
Президентимиз 23 июнь куни Наманган вилоятига ташрифи доирасида мутасаддиларнинг ҳудудни ривожлантириш юзасидан ахборотларини тинглади.
Наманганда “ақлли” вазиятлар маркази ташкил этилган, унинг мақсади шаҳар ва туманлардаги жараёнларни ягона рақамли тизим орқали таҳлил қилиш, бошқарув қарорларини тезкор қабул қилиш, аҳоли учун қулай ва хавфсиз муҳит яратишдан иборат.
Норин туманидаги Янги Наманган маҳалласида ташкил этилаётган “Маҳалла ахборот ва хизмат маркази” лойиҳаси тақдимот қилинди.
Мазкур марказ орқали 8 та маҳаллада истиқомат қилувчи 27 минг нафардан ортиқ аҳолига 980 турдаги хизмат маҳалланинг ўзида, “ягона дарча” тамойили асосида кўрсатилиши режалаштирилган. Бунда ижтимоий ҳимоя, бандлик, профилактика, солиқ, жиноятчилик, таълим ва ҳудуднинг бошқа муҳим кўрсаткичларига оид маълумотлар ягона рақамли тизимга интеграция қилинади.
Профилактика инспекторлари фаолияти самарадорлигини янада оширишга қаратилган тақдимотда эса ҳуқуқбузарликлар профилактикасига оид 18 турдаги жараён рақамлаштирилиб, ходимлар планшетларига интеграция қилингани маълум қилинди. Инспекторлар замонавий ёнкамералар билан таъминланиб, уларнинг фаолияти вазиятлар маркази билан узвий боғланган.
Шу ерда Президентимизга Наманган вилоятини ижтимоий-иқтисодий ривожлантиришнинг янги устувор йўналишлари юзасидан ахборот берилди.
III
30 июнь — Ёшлар куни муносабати билан мамлакатимиз етакчисининг ёшлар билан учрашув ва мулоқотлари яхши анъанага айланган. Жонли кечадиган мулоқотда ёшлар тўғридан тўғри Президентимизга ўз таклифларини беради. Бу юртимиз келажагининг эгалари олдида ноёб имкониятлар эшигини очади. Зотан, бугун мамлакатимиз аҳолисининг олтмиш фоизидан кўпроғини ёшлар ташкил қилади.
Ушбу форматдаги учрашув тараққиёт ва келажак учун муҳим жараёндир. Унда баркамол авлод тақдирига доир масалалар кўтарилиб, ташаббуслар илгари сурилади, мамлакат келажагига дахлдор кўплаб вазифалар белгилаб олинади. Бу галги учрашув ва мулоқот ҳам кўтаринки руҳда бошланди. Давлатимиз раҳбари сўзининг аввалида юртимиздаги барча йигит-қизларни байрам билан самимий табриклади.
— Биз ислоҳотларимизнинг илк кунларидан ёшларни қўллаб-қувватлаш, уларнинг орзу ва интилишларини рўёбга чиқаришни давлат сиёсатининг энг устувор йўналишларидан бири сифатида белгилаб олганмиз, — деди Президентимиз ва ёшларни буюк аждодларимизга муносиб ворис бўлишга, янги Ўзбекистонда Учинчи Ренессанс пойдеворини яратишга даъват этди. Уларнинг ҳаётда муносиб ўрин топиши учун билим, касб ва технологияни энг муҳим таянч сифатида кўрсатди.
Учрашувда ёшлар билан очиқ мулоқот бўлиб ўтди. Улар ўз таклиф ва ташаббусларини билдирди. Давлатимиз раҳбари мулоқот якунида йигит-қизларни катта марралар сари дадил интилишга, билим, касб ва замонавий технологияларни пухта эгаллашга даъват этди.
— Мен сизлардаги шижоат, билимга ташналик ва янгиликка интилишни кўриб, доим руҳланаман. Катта-катта марралар сари олға қадам ташланг, ўқинг, янги билим, янги касб ва замонавий технологияларни эгалланг, қийинчиликдан чўчиманг, меҳнатдан қочманг! Шуни билингки, ортингизда сизларни катта умидлар билан вояга етказган ота-онангиз бор, сизларга билим ва тарбия берган, касб ўргатган устоз ва мураббийларингиз бор, сизларга ҳамиша таянч ва суянч бўладиган, ишонадиган ва доим қўллаб-қувватлайдиган Президентингиз бор! — деди мамлакатимиз етакчиси.
Сана арафасида ўз билими, истеъдоди, ташаббускорлиги ва фидойилиги билан янги Ўзбекистон тараққиётига муносиб ҳисса қўшаётган бир гуруҳ ёшлар “Келажак бунёдкори” медали ва “Мард ўғлон” давлат мукофоти билан тақдирланган эди. 30 июнь — Ёшлар кунида Тошкентдаги Олимпия шаҳарчасида ана шу мукофотларни топшириш маросими бўлди.
Давлатимиз раҳбари юртимиз ёшларининг ҳар бирида катта салоҳият, истеъдод ва иқтидор борлигини қайд этди. Мукофотланган ёшлар давлатимиз томонидан яратилаётган имкониятлар учун миннатдорлик билдириб, бундан буён ҳам ўз билими, меҳнати ва ташаббуслари билан Ватанимиз равнақига муносиб ҳисса қўшишга тайёр эканини таъкидлади.
Президентимиз шу куни Олимпия шаҳарчасида Ёшлар куни муносабати билан ташкил этилган махсус кўргазмада ҳам бўлди.
Давлатимиз раҳбари фаол ва изланувчан ёшларнинг маҳалла ҳаёти, экология, стартаплар, муҳандислик ва китобхонлик маданиятини юксалтириш каби соҳалардаги лойиҳалари билан танишди, лойиҳа ташаббускорлари билан шахсан мулоқот қилди.
IV
Июнь ойида давлатимиз раҳбарининг таклифига биноан Албания Республикаси Президенти Байрам Бегай, Германия Федератив Республикаси Президенти Франк-Вальтер Штайнмайер расмий ташриф билан мамлакатимизда бўлди. Олий даражадаги музокараларда кўп қиррали ҳамкорликни янада ривожлантириш истиқболлари муҳокама қилинди.
* * *
Шунингдек, Ўзбекистон Республикаси Президенти бир қатор давлат етакчилари билан телефон орқали мулоқот ўтказди, хорижий делегацияларни қабул қилди. Давлатимиз раҳбари ҳузурида юртимиз ижтимоий-сиёсий ҳаёти билан боғлиқ долзарб масалаларга бағишланган тақдимот ва видеоселектор йиғилишлари бўлиб ўтди.
Нодир МАҲМУДОВ,
“Янги Ўзбекистон” мухбири
