Маълум қилинишича, хизматлар, чакана савдо, умумий овқатланиш ва ишлаб чиқариш соҳаларида ишчи кучи бўйича талаб юқори бўлган.
Муқобил манбаларга кўра, жорий йилнинг биринчи чорагида фаол резюмелар сони 31,5 фоизга ошиб, 636 минг нафарга етган. Бу эса меҳнат бозорида рақобат кучайиб бораётганини кўрсатади.
Таҳлилда қайд этилишича, иқтисодиётда бандликнинг ўсиши асосан хусусий сектор ҳисобига таъминланган. 2025 йилда хусусий секторда бандлик 5,2 фоизга ошган бўлиб, энг юқори ўсиш хизматлар соҳасида кузатилган. Давлат секторида эса мазкур кўрсаткич 2,6 фоизни ташкил этган.
Шу билан бирга, ишсизлик даражаси пасайиш тенденциясини сақлаб қолиб, 2025 йил тўртинчи чораги якунларига кўра 4,8 фоизга тушган.
Биринчи чоракда ўртача номинал иш ҳақи 17,4 фоизга, реал иш ҳақи эса 9,5 фоизга ошган. Энг юқори иш ҳақи ўсиши молиявий ва суғурта фаолияти, транспорт ҳамда бошқа хизмат кўрсатиш соҳаларида қайд этилган.
Марказий банк маълумотларига кўра, меҳнат унумдорлиги ўсиш суръатларининг секинлашиши иқтисодий ўсишда бандликни кенгайтириш омили аҳамияти ортиб бораётганини кўрсатмоқда. Шу билан бирга, реал иш ҳақининг меҳнат унумдорлигига нисбатан тезроқ ўсиши иқтисодиётда инфляцион босимлар сақланиб қолаётганидан далолат беради.
Ҳисоботда ташқи меҳнат миграцияси бўйича ҳам ижобий динамика қайд этилган. Жорий йилнинг биринчи чорагида Ўзбекистонга юборилган пул ўтказмалари ҳажми 3,8 миллиард АҚШ долларини ташкил этиб, ўтган йилнинг мос даврига нисбатан 13 фоизга ошган.
Шунингдек, меҳнат миграцияси географияси кенгайиб бормоқда. Хусусан, Туркия ва Жанубий Кореяга меҳнат миграцияси ошган бўлса, Россиядан келаётган пул ўтказмаларининг умумий улуши 77,6 фоиздан 72,4 фоизгача қисқарган.
