Жиззах тиббиёт кластерида илк бор муваффақиятли амалга оширилган буйрак трансплантацияси ана шундай қутлуғ ва тарихий воқеалардан бири бўлди.
Бу каби ютуқлар ўз-ўзидан ёки тасодифан пайдо бўлаётгани йўқ.
Давлатимиз раҳбарининг вилоятга ташрифи чоғида Жиззах тиббиёт кластери фаолияти
билан шахсан танишиб, бу ерда яратилган замонавий шароитлар, юқори технологик
тиббий хизматлар имкониятларига алоҳида эътибор қаратгани ва маҳаллий
шифокорларни қўллаб-қувватлагани соҳа ривожига мутлақо янги суръат ва катта
ишонч бағишлади. Бугун ана шу юксак эътибор, тизимли ғамхўрлик ва қатъий ирода
илк амалий, ҳаётий меваларини бермоқда.
Жиззах тиббиёт кластерида илк маротаба буйрак кўчириб ўтказиш мураккаб
жарроҳлик амалиёти муваффақиятли бажарилгани нафақат вилоят, балки мамлакат
соғлиқни сақлаш тизими ҳаётидаги улкан қадам сифатида баҳоланмоқда. Зеро,
трансплантология тиббиётнинг энг мураккаб, нозик ва юқори малака ҳамда
замонавий инфратузилмани талаб қилувчи соҳаларидан биридир.
Мазкур мураккаб жарроҳлик амалиёти Миллий тиббиёт марказининг
трансплантология бўйича етакчи мутахассиси, тиббиёт фанлари доктори Жасур
Собиров бошчилигидаги юқори малакали жамоа ҳамда Жиззах тиббиёт кластерининг
маҳаллий шифокорлари билан ҳамкорликда, чинакам маҳорат мактаби сифатида амалга
оширилди.
Ушбу хайрли иш давлатимиз раҳбарининг 2026 йил 21 майдаги “Муборак
Қурбон ҳайити муносабати билан аҳолини давлат томонидан қўллаб-қувватлаш ва
меҳр-саховат тадбирларини самарали ташкил этиш тўғрисида”ги қарори асосида,
“Вақф” хайрия жамоат фонди маблағлари ҳисобидан тўлиқ молиялаштирилган ҳолда
ўтказилди.
Давлатимиз раҳбарининг бу қарори умиди сўниш арафасида турган беморлар
учун ҳаётбахш куч бўлди. Жиззахдаги мазкур операция эса қоғоздаги эзгу
ғояларнинг амалда қандай қилиб инсон ҳаётини сақлаб қолишига жонли мисолдир.
Тўққиз йил... Бу шунчаки оддий рақам эмас. Бу сурункали буйрак
етишмовчилиги касаллиги билан оғриган, ҳафтасига бир неча бор гемодиализ
аппаратига боғланиб, яшаш учун тиш-тирноғи билан курашган Сарвар Абдиевнинг
изтиробли йилларидир. 1985 йилда туғилган бемор узоқ йиллар давомида оғир дард
юкини елкасида кўтариб, ҳаётнинг ҳар бир кунини умид ва хавотир, оғриқ ва
изтироб билан қарши олган. Унинг учун трансплантация амалиёти ягона ва охирги
нажот эди.
Тиббий текширувлар натижасида унга донор сифатида 1978 йилда туғилган
амакиваччаси Юнус Абдиевнинг организми тўлиқ мос келиши аниқланди. Операция
муваффақиятли якунланиб, бемор палатага олингач, у билан суҳбатлашдик.
— Яратганга беҳисоб шукрлар бўлсин, бугун ўзимни худди дунёга қайта
келгандек ҳис қиляпман, — дейди Сарвар қувонч кўз ёшларини артиб. — Аҳволим
анча яхши. Ростини айтсам, тўққиз йил давомида чеккан азобларим, умидсизликка
тушган кунларим ортда қолганига ҳалиям ишонгим келмаяпти... Ҳар гал гемодиализ
аппаратига ётганимда, танам мадорсизланганда, яшашдан чарчаб кетардим. Буйрак
кўчириш операцияси жуда қимматлиги, оиламизнинг иқтисодий имкониятлари
чеклангани сабабли баъзан тақдирга тан бериб, умидимни бутунлай узиб қўйган
кунларим бўлган. Президентимизнинг мазкур тарихий қарори мен каби касал, аммо
чорасиз инсонларга янги ҳаёт эшикларини очди. Давлатимиз бизни ташлаб
қўймаганини, оғир кунимизда елкадош бўлганини қалбдан ҳис қилдим. Мен бугун
қайта туғилгандек бўлдим.
Сарварнинг ҳикоясида яна бир қалбни ларзага солувчи муҳим жиҳат бор,
бу халқимизга хос меҳр-оқибат ва жигарчилик ришталарининг қудратидир. Донор
излаш жараёни бошланганда унинг қариндошлари, яқинларидан бир неча киши
иккиланмай, ўз жигарини қутқариш учун буйрагини беришга тайёр эканини
билдирган. Бу юксак меҳр оғир аҳволдаги беморга операциядан олдин улкан руҳий
куч, ҳаётга кучли ишонч бағишлаган эди.
Қариндошлик меҳри ва инсонпарварликнинг юксак намунасини кўрсатган
Юнус Абдиев амакиваччасининг соғлом ҳаётга қайтиши учун ўз танасининг бир
бўлагини бериш қарорини ҳеч бир иккиланишсиз, чин юракдан қабул қилганини
таъкидлайди:
— Яқин қариндошинг-жигаринг кўз ўнгингда сўниб борса, буни кўриб туриш
энг катта азоб. Амакимнинг ўғли Сарваржонга донор кераклигини ва буйрагим унга
мос келишини айтишганда, бир дақиқа ҳам ўйлаб ўтирганим йўқ. Ахир биз бир
дарахтнинг шохларимиз, қонимиз бир. Оилам, фарзандларим ҳам бу қароримни тўлиқ
қўллаб-қувватлади ва дуо қилиб турди. Бугун шифокорлар юзидаги табассумни
кўриб, операция муваффақиятли ўтганини билганимда Яратганга шукроналар айтдим.
Энг муҳими, укам яна соғлом ҳаётга, фарзандлари бағрига қайтмоқда. Унинг
кўзидаги ҳаёт учқунини кўриш мен учун катта бахт.
Ушбу жарроҳлик амалиёти ҳудудда трансплантология хизматини
ривожлантириш йўлидаги муҳим қадам бўлиб, аҳоли учун ҳам юқори технологик
тиббий ёрдам имкониятларини янада кенгайтиради.
— Бугунги сана Жиззах вилояти
тиббиёти тарихига чинакам зарҳал ҳарфлар билан унутилмас кун сифатида
муҳрланади, — дейди Жиззах вилояти Соғлиқни сақлаш бошқармаси бошлиғи
Махмарасул Умаров. — Илгари бундай операциялар биз учун ушалмас армон эди.
Беморларимиз юз миллионлаб маблағ топиб, хорижий давлатларга, Ҳиндистон ёки
Туркия каби мамлакатларга боришга, сарсон бўлишга мажбур эди. Кўпчиликнинг
бунга молиявий қурби етмасди. Мана, соҳага қаратилаётган юксак эътибор туфайли
юқори технологияли тиббий хизмат аҳолига ўзи яшаётган ҳудудда кўрсатилмоқда.
Маҳаллий шифокорларимиз пойтахтлик олимлар билан елкама-елка туриб бу амалиётни
бажарди, бу улар учун катта тажриба ва маҳорат мактаби бўлди. Вилоятимизда
ҳозирги кунда гемодиализ олаётган 259 беморимиз бор. Ишонч билан айта оламанки,
бу ҳали бошланиши. Биз давлатимиз яратиб бераётган имкониятлардан фойдаланиб,
қолган беморларимизни ҳам босқичма-босқич мана шундай тиббий ёрдам билан қамраб
оламиз ва уларни соғлом ҳаётга қайтарамиз. Бизда энди куч ҳам, шароит ҳам,
билим ҳам етарли.
Жиззах тиббиёт кластерида бажарилган илк буйрак трансплантацияси
шифокорлар маҳорати, замонавий тиббий инфратузилма ва давлат томонидан
яратилаётган шароитлар уйғунлигининг амалий натижасидир.
Энг муҳими, бу воқеа Ўзбекистонда инсон қадри шунчаки баландпарвоз
шиор эмас, балки энг олий ҳаётий қадрият сифатида эътироф этилаётганининг яна
бир ёрқин исботи бўлди. Бир оддий инсоннинг соғлиғи, бир ночор оиланинг бахти,
бир беморнинг сўниб бораётган умиди давлат сиёсати даражасида
қўллаб-қувватланаётгани янги Ўзбекистоннинг чинакам инсонпарварлик ва
меҳр-муҳаббатга йўғрилган моҳиятини бутун дунёга намойиш этмоқда.
Жиззах тиббиёт кластеридаги ушбу тарихий операция нафақат бир беморга
янги ҳаёт бахш этди, балки шифохона ўриндиқларида нажот кутиб ётган юзлаб беморларга
сўнмас умид, минглаб инсонларга чексиз ишонч ва бутун жамиятимизга эзгулик
ҳамда меҳр-саховатнинг буюк қудратини яна бир бор исботлаб берди.
Фарҳод НЕЪМАТОВ,
“Янги Ўзбекистон”
мухбири
