Энергетика вазирлигининг маълум қилишича, тарқалган видеода акс этган ҳолат аслида Қашқадарё вилоятининг Миришкор туманидаги янги «Patron» газконденсат конида қидирув қудуғини синовдан ўтказиш ва ишга тушириш жараёни ҳисобланади.

Кондаги 1-сонли қидирув қудуғини бурғилаш ишлари 2025 йилда Хитойнинг BGP компанияси томонидан ўтказилган 3D сейсмик тадқиқотлар натижалари асосида бошланган.

Бурғилаш ишлари якунлангач, қудуқда 3296–3339 метр оралиғидаги қатламлар маҳсулдорликка синовдан ўтказилди. Натижада саноат миқёсида табиий газ олинди. Дастлабки маълумотларга кўра, қудуқдан суткасига 500 минг метр куб газ олинмоқда.

«Patron» нисбатан кичик кон бўлиб, дастлабки ҳисоб-китобларга кўра, унинг захиралари тахминан 2,5 млрд куб метр табиий газни ташкил этади.

Қудуқни синовдан ўтказиш жараёнида газни махсус қурилма орқали ёқиб кўриш унинг маҳсулдорлиги, босими ва ишлаш параметрларини аниқлашга қаратилган одатий технологик жараён ҳисобланади. Шу сабабли видеодаги оловни портлаш ёки авария сифатида талқин қилиш асоссиз.

Айни пайтда қудуқдан газ қазиб чиқаришнинг ҳақиқий кўрсаткичларини аниқлаш мақсадида «OʻzLITIneftgaz» АЖ мутахассислари томонидан газодинамик ва газконденсат тадқиқотлари олиб борилмоқда.

«Patron» конидаги 1-сонли қидирув қудуғи 2026 йил 2 сентябрь куни соат 06:00 да газ қувурига уланиб, ишга туширилган.

Қудуқни ишга тушириш ишлари нефт-газ соҳасининг ҳарбийлаштирилган қисми ва «OʻzLITIneftgaz» АЖ мутахассислари иштирокида саноат, ёнғин, меҳнат ва экологик хавфсизлик талабларига риоя қилинган ҳолда амалга оширилган. Зарур ташкилий ва техник чоралар Фавқулодда вазиятлар вазирлиги вакиллари назоратида таъминланган.

Масъуллар ижтимоий тармоқ администраторларидан воқеа-ҳодисаларни аниқлаштирмасдан, нотўғри ва асоссиз маълумотларни тарқатмасликни сўради. Расмий маълумотларни соҳанинг ишончли манбалари орқали олиш тавсия этилган.