Тадбирга Россияда ишлаётган ва таҳсил олаётган ватандошлар, мамлакатнинг турли ҳудудларидан 52 та ўзбек диаспора, жамоат ва маданий ташкилотлари вакиллари, санъаткорлар, ижодий жамоалар ҳамда Москва аҳолиси йиғилди.
Учрашув давомида мусиқий ва рақс чиқишлари, миллий ҳунармандчилик буюмлари ва анъанавий маданият намуналари намойиш қилиниб, ўзбек миллий таомлари тортилди. Меҳмонлар учун байрам дастури доирасида Тошкент, Самарқанд ва Бухоро паловлари ҳам тайёрланди.
Байрам тадбири “МИР 24” телеканали орқали намойиш этилди. Телеканалда эфирга узатилган видеолавҳада миллий концерт дастури, ҳунармандчилик, Хоразм лазгиси ва ўзбек палови тайёрлангани ҳақида маълумотлар берилди.
Куннинг иккинчи ярмида Ўзбекистон элчихонасида ташқи ишлар вазири ўринбосари Олимжон Абдуллаев, Миграция агентлиги директори Беҳзод Мусаев, Ўзбекистон элчиси Ботиржон Асадов ва 52 та диаспора бирлашмаси раҳбарлари иштирокида учрашув бўлиб ўтди.
Иштирокчилар Россиядаги ватандошларни қўллаб-қувватлаш, жумладан, ишга жойлаштириш, ҳуқуқий ёрдам кўрсатиш ва миграция тартиб-таомилларини такомиллаштириш масалаларини муҳокама қилди. Миграция агентлигининг Москвадаги ваколатхонаси қошидаги тун-у кун ишлайдиган тезкор штаб ва колл-марказ фаолиятига алоҳида эътибор қаратилди.
Учрашув давомида Россиядаги Ўзбекистон фуқароларининг ҳуқуқ ва қонуний манфаатларини ҳимоя қилиш, фуқароларнинг қўлга олиниши ҳолатлари тўғрисида Ўзбекистон томонини ўз вақтида хабардор қилиш, миграция тадбирларини ўтказишда уларнинг ҳуқуқларига риоя этиш ва юзага келадиган масалалар бўйича тезкор ҳамкорлик қилиш масалалари ҳам кўриб чиқилди.
Диаспора вакиллари Ўзбекистон мустақиллигининг 35 йиллиги билан табрикланиб, уларга ватандошларга иш топиш, юзага келаётган муаммоларни ҳал этиш ва Ватанига қайтишда кўрсатаётган ёрдами учун миннатдорлик билдирилди. Уларнинг Ўзбекистоннинг туризм салоҳиятини тарғиб қилиш ва Россияда мамлакатнинг ижобий қиёфасини шакллантиришдаги ўрни алоҳида қайд этилди.
Тадбир якунида энг фаол диаспора ташкилотлари раҳбарлари тақдирланди.
