Бу ҳақда Маданият вазирлиги маълум қилди.
Қайд этилишича, 2018 йилдан буён ҳар икки йилда бир марта ташкил этиб келинаётган нуфузли маданий форумнинг асосий мақсади Шарқ мумтоз мусиқа санъатининг ноёб йўналишларидан бири бўлган мақом санъатини кенг тарғиб қилиш, уни асраб-авайлаш ва ривожлантириш, ёшлар орасида мазкур санъат турига қизиқишни ошириш ҳамда халқаро маданий ва илмий-ижодий ҳамкорликни мустаҳкамлашдан иборат.
Анжуман доирасида илмий-амалий конференция, мақом ансамбллари, хонандалар ва чолғучилар ўртасида халқаро танлов, шунингдек, Ўзбекистон ва хорижнинг таниқли санъаткорлари иштирокида яккахон концертлар ташкил этилади.
Танлов ғолиблари диплом ва ҳайкалча билан бирга қуйидаги пул мукофотлари билан тақдирланади:
- Гран-при — 15 минг АҚШ доллари;
- биринчи ўрин (2 нафар) — ҳар бири 10 минг АҚШ доллари;
- иккинчи ўрин (2 нафар) — ҳар бири 7 минг АҚШ доллари;
- учинчи ўрин (2 нафар) — ҳар бири 5 минг АҚШ доллари.
Шунингдек, «Энг яхши мақом хонандаси», «Энг яхши мақом чолғучиси», «Энг яхши мақом устаси», «Энг яхши мақом тарғиботчиси», «Энг яхши ёш мақом ижрочиси» ҳамда «Энг яхши мақом бастакори» номинациялари бўйича махсус мукофотлар ҳам топширилади.
Ташкилотчилар таъкидлашича, III Халқаро мақом санъати анжумани миллий мусиқа меросини жаҳон миқёсида кенг тарғиб этиш, маданиятлараро мулоқотни ривожлантириш ва санъат соҳасидаги халқаро ҳамкорликни янги босқичга олиб чиқишга хизмат қилади.
