ИИВ ЙҲХБ матбуот хизмати маълумотига кўра, ҳодиса 5 май куни соат 09:05 атрофида “Янгиҳаёт” маҳалласи ҳудудидан ўтувчи маҳаллий аҳамиятга эга 85В-043 автомобиль йўлида юз берган.
34 ёшли Г.К. бошқарувидаги Matiz автомашинаси эҳтиётсизлик оқибатида йўлдан чиқиб кетиб, ағдарилган. Оқибатда ҳайдовчи шифохонада вафот этган.
Автомобилда бўлган 14 нафар бола турли тан жароҳатлари билан шифохонага ётқизилган. Улар орасида ҳайдовчининг уч ойлик фарзанди ҳам бўлган.
Қайд этилишича, аёлда транспорт воситасини бошқариш учун рухсат берувчи ҳужжат ва етарли тажриба бўлмаган. У хусусий оилавий боғча раҳбари экани аниқланган.
Ҳозирда ҳолат юзасидан ЖКнинг 266-моддаси 2-қисми билан жиноят иши қўзғатилган. Тергов ҳаракатлари олиб борилмоқда.
