Бу Президентнинг 2026 йил 29 сентябрдаги «Олий таълимда дуал таълим шаклида кадрлар тайёрлаш тизимини такомиллаштириш чора-тадбирлари тўғрисида»ги ПФ–209-сон фармонида белгиланган.
Янги тизим «корхона — олийгоҳ — мақсадли кадр» тамойили асосида ташкил этилади. Бунда корхоналар ўзларига зарур мутахассисларга буюртма беради ва келажакда ишга қабул қилиш шарти билан талабаларни тайёрлашда иштирок этади.
Талабалар қандай қабул қилинади?
Дуал таълим йўналишлари ва қабул квоталари олий таълим ташкилотлари томонидан ҳар йили 1 сентябрга қадар белгиланади. Номзодлар эса иш берувчи корхона ва ташкилотлар томонидан танлов асосида саралаб олинади.
Корхона йўлланмаси билан айрим номзодлар тўғридан тўғри имтиҳонсиз ўқишга қабул қилиниши мумкин. Шунингдек, иш берувчи буюртмаси асосида ташкил этилган саралаш имтиҳонлари натижаларига кўра ҳам қабул амалга оширилади.
Техникумларда олий таълим билан интеграциялашган ўрта махсус касбий таълим дастурларини тамомлаган битирувчиларга мос бакалавриат йўналишларининг 2 ёки 3-курсидан ўқишни давом эттириш имконияти берилади.
Талабаларга ойлик маош тўланади
Дуал таълим олийгоҳ, иш берувчи ва талаба ўртасида тузиладиган шартнома асосида амалга оширилади. Унга кўра, корхона талабага ўқиш даврида ўзининг бюджетдан ташқари маблағлари ҳисобидан ойлик иш ҳақи тўлайди.
Бироқ бунинг эвазига битирувчи ўқишни тугатганидан кейин камида икки йил давомида шартнома тузган корхона ёки унинг тизимидаги ташкилотда ишлаб бериши шарт бўлади.
Ўқишнинг катта қисми амалиётга ажратилади
Янги тартибда назарий ва амалий таълим нисбати ҳам белгиланган. Ўқув жараёнининг камида 30 фоизи назарий таълимга ажратилади, қолган қисми эса амалий тайёргарлик асосида ташкил этилади.
Талабаларнинг корхоналардаги амалий машғулотлари ва иштироки CareerEdu платформаси орқали мониторинг қилиб борилади.
Давлат ва давлат улуши мавжуд корхоналарга ҳам олий таълим ташкилотларига дуал таълим асосида мутахассис тайёрлаш бўйича буюртма бериш ва харажатларни бюджетдан ташқари маблағлар ҳисобидан қоплаш ҳуқуқи берилади.
Яна бир муҳим жиҳат: дуал таълимда таҳсил олаётган талабаларни таълимнинг бошқа шаклларига ўтказишга рухсат берилмайди. Бунга фақат корхона билан тузилган шартномада тегишли ўзгартириш назарда тутилган тақдирдагина йўл қўйилади.
