Ҳужжатга кўра, мамлакатда маъмурий жавобгарлик соҳасидаги қонунчиликни замонавий халқаро стандартлар ва илғор хорижий тажриба асосида қайта кўриб чиқиш режалаштирилган.

Фармойиш билан маъмурий жавобгарлик тўғрисидаги қонунчиликни такомиллаштириш бўйича идоралараро комиссия ҳамда Маъмурий жавобгарлик тўғрисидаги кодекснинг янги таҳририни ишлаб чиқиш бўйича ишчи гуруҳ ташкил этилди.

Ҳужжатда қонунчиликни ислоҳ қилишнинг бир қатор устувор йўналишлари белгиланган. Жумладан:

  • маъмурий жавобгарлик тўғрисидаги қонунчилик нормаларини тизимлаштириш ва унификация қилиш, уларнинг барқарорлигини таъминлаш;
  • маъмурий ҳуқуқбузарликларни замонавий шарт-шароитлардан келиб чиқиб қайта кўриб чиқиш, шу жумладан, аҳамиятини йўқотган ҳуқуқбузарликларни бекор қилиш ҳамда юридик ва жисмоний шахслар, давлат ва жамият манфаатларига, қонунийлик ва ҳуқуқ-тартиботга таҳдид солаётган ҳуқуқбузарликлар учун жавобгарлик чораларини такомиллаштириш ва янгиларини киритиш;
  • ҳуқуқбузарликларнинг ижтимоий хавфлилик даражаси ҳамда жазонинг профилактик таъсирини инобатга олган ҳолда маъмурий жавобгарлик чораларининг мутаносиблигини таъминлаш, муқобил жазо чораларини назарда тутган ҳолда маъмурий жазо тизимини такомиллаштириш;
  • ҳуқуқбузарликларни аниқлаш, кўриб чиқиш ва маъмурий жазо чораларини қўллашда давлат органлари ва мансабдор шахсларнинг ролини аниқлаштириш, уларнинг рўйхатини мақбуллаштириш ва нисбий барқарорлигини таъминлаш;
  • процессуал нормаларни тубдан такомиллаштириш, бунда инсон ҳуқуқлари ва қонуний манфаатлари ишончли ҳимоя қилинишини, ҳуқуқий аниқлик ва илмий асосланганликни таъминлаш;
  • жабрланувчига етказилган маънавий зарарни қоплаш механизмларини такомиллаштириш, шунингдек, жабр кўрган шахс манфаатларини таъминлашда компенсация (товон пули) тўлаш ва бошқа муқобил институтларни жорий этиш;
  • маъмурий ҳуқуқбузарликлар тўғрисидаги ишларни кўриб чиқишда суд назоратини кенгайтириш ва такомиллаштириш.

Фармойишга мувофиқ, Адлия вазирлиги 2027 йил 1 апрелга қадар Маъмурий жавобгарлик тўғрисидаги кодекснинг янги таҳририни ишлаб чиқиб, манфаатдор идоралар билан келишиши ва жамоатчилик муҳокамасидан ўтказиши керак.

Ҳужжатда маъмурий жавобгарлик соҳасида илғор хорижий тажрибани ўрганиш, халқаро экспертлар ва маҳаллий олимларни жараёнга жалб қилиш вазифалари ҳам белгиланган.

Фармойиш ижроси учун шахсан адлия вазири Акбар Тошқулов масъул этиб белгиланган.