Тадбир доирасида делегация раҳбарларини Тожикистон Президенти Эмомали Раҳмон қабул қилди. Учрашувда терроризм, экстремизм, наркотрафик ва уюшган жиноятчиликка қарши курашиш, киберхавфсизликни таъминлаш, ноқонуний миграциянинг олдини олиш ҳамда туристлар хавфсизлигини таъминлаш соҳаларида ҳамкорликни кучайтириш масалалари муҳокама қилинди.

Тожикистон раҳбари ҳуқуқни муҳофаза қилиш соҳасидаги минтақавий ҳамкорликни янада ривожлантириш ва мувофиқлаштирилган ёндашувларни кучайтириш муҳимлигини таъкидлади.

Кенгаш йиғилишида Озарбайжон, Арманистон, Беларусь, Қозоғистон, Қирғизистон, Россия, Тожикистон ва Туркманистон ички ишлар вазирликлари раҳбарлари, шунингдек, МДҲнинг тегишли тузилмалари вакиллари ҳам қатнашди.

Иштирокчилар кўп томонлама ва икки томонлама ҳамкорликнинг устувор йўналишлари, шунингдек, 2029–2033 йилларда жиноятчиликка қарши курашиш бўйича қўшма чора-тадбирлар давлатлараро дастурини амалга ошириш масалаларини кўриб чиқди.

Йиғилишда ахборот алмашинуви, геном маълумотларини тақдим этиш, ноқонуний миграцияга қарши курашиш, давлатлараро қидирув ва ахборот-коммуникация технологияларидан фойдаланган ҳолда содир этиладиган трансмиллий жиноятларга қарши курашиш бўйича қатор ҳужжатлар имзоланди.

Мазкур йиғилишда Ўзбекистон томонидан илгари сурилган кибержиноятчиликка қарши курашиш бўлинмалари раҳбарларининг учрашувларини ташкил этиш ташаббуси ҳам қўллаб-қувватланди. Тегишли қарор кенгаш аъзолари томонидан бир овоздан маъқулланиб, имзоланди.

Ушбу ташаббус кибержиноятчиликка қарши курашишда масъул бўлинмалар раҳбарлари ўртасида тўғридан-тўғри мулоқотни йўлга қўйиш, ахборот алмашиш ва трансчегаравий жиноятларга қарши тезкор ҳамкорликни кучайтиришга қаратилган.

Тадбир якунида томонлар ҳамкорликни институционал даражада ривожлантириш ва амалий натижаларга йўналтирилган қўшма лойиҳаларни амалга ошириш бўйича келишувга эришди.