Атроф-муҳитни муҳофаза қилиш технологиялари, қайта тикланувчи энергия манбалари, вентиляция, сув таъминоти ва сантехниканинг замонавий технологияларига бағишланган халқаро тадбир соҳа вакилларини бир майдонга жамлади.
Кўргазмада 11 мамлакатдан 200 дан зиёд халқаро ва маҳаллий компания иштирок этмоқда. Уларга ўз маҳсулот ва ечимларини намойиш этиш, янги ғоялар билан ўртоқлашиш ҳамда соҳадаги илғор тажрибаларни ўрганиш имконияти яратилган.
Бугунги кунда бино ва иншоотларга қўйиладиган талаблар уларнинг меъморий қиёфаси билан чекланмайди. Яшаш ва ишлаш учун қулай муҳит яратиш, хавфсизликни таъминлаш, энергия ва сув ресурсларидан оқилона фойдаланиш ҳам замонавий қурилишнинг муҳим йўналишларига айланмоқда.
Шу жиҳатдан «Aquatherm Tashkent 2026» кўргазмасида микроиқлим яратиш, энергия самарадорлигини ошириш, сув таъминоти ва сантехника тизимларини такомиллаштириш, шунингдек, «яшил» технологияларни жорий этишга алоҳида эътибор қаратилган.
Тақдим этилаётган ечим ва таклифлар қурилиш компаниялари ҳамда лойиҳа ташкилотлари учун янги имкониятлар яратиб, уй-жой лойиҳаларини янада қулай, тежамкор ва замонавий талаблар асосида такомиллаштиришга хизмат қилади.
