Экология ва иқлим ўзгариши миллий қўмитасига туман аҳолиси томонидан «Ч.Т.» корхонаси атроф-муҳитни ифлослантираётгани ҳақида мурожаат келиб тушган.
Мурожаат асосида Экология қўмитаси, Андижон вилояти Экология бошқармаси ҳамда Экополиция ходимлари корхона ҳудудида экологик назорат тадбирини ўтказди.
Текширувда корхонада атмосфера ҳавосини муҳофаза қилиш бўйича зарур чора-тадбирлар ишлаб чиқилмагани, тошни қайта ишлаш жараёнида чанг-газ тозалаш ускуналари мавжуд эмаслиги аниқланган.
Лаборатория таҳлиллари натижасида атмосфера ҳавосига меъёрдан ортиқ миқдорда зарарли моддалар чиқарилаётгани ҳам маълум бўлган.
Бундан ташқари, ишлаб чиқаришдан ҳосил бўлган чиқиндилар корхона ҳудудида тартибсиз жойлаштирилгани ва корхона тегишли давлат экологик экспертизасининг ижобий хулосасини олмасдан фаолият юритаётгани аниқланган.
Аниқланган камчиликларни бартараф этиш мақсадида корхона фаолияти 10 кун муддатга тўхтатилди.
Корхонага камчиликларни бартараф этиш, чиқиндиларни белгиланган тартибда сақлаш ва олиб чиқиш ҳамда экологик экспертизанинг ижобий хулосасини олиш бўйича кўрсатмалар берилди.
Шунингдек, атроф-муҳитга етказилган зарар учун қўшимча компенсация тўловини ундириш белгиланди.
