21 август куни «Ўзатом» агентлигида Ўзбекистоннинг тегишли вазирлик ва идоралари ҳамда Қозоғистон делегацияси иштирокида ишчи музокаралар бўлиб ўтди. Қозоғистон делегациясига Экология ва табиий ресурслар вазири ўринбосари Мансур Ошурбаев бошчилик қилди. Бу ҳақда «Ўзатом» агентлиги хабар берди.
Учрашувда АЭС лойиҳасини амалга оширишда иштирок этаётган Ўзбекистон ташкилотлари томонидан лойиҳа, қидирув ва тайёргарлик ишларининг бориши, шунингдек, хавфсизлик ва экологик мониторингни таъминлаш бўйича ёндашувлар тақдим этилди.
«Хавфсизлик — Ўзбекистон миллий атом дастурининг шубҳасиз устувор йўналишидир. Биз миллий қонунчилик ва халқаро стандартларга мувофиқ ядровий, радиациявий ва экологик хавфсизлик тизимини изчил йўлга қўймоқдамиз», — деди «Ўзатом» агентлиги директори Азим Ахмедхаджаев.
Ишчи йиғилишда Қозоғистон томонининг саволларига Ўзбекистон Энергетика, Экология вазирликлари ҳамда Фавқулодда вазиятлар вазирлиги вакиллари жавоб берди. Томонлар лойиҳанинг техник ва экологик жиҳатларини муҳокама қилди.
Учрашув якунида келгусидаги ҳамкорликнинг асосий йўналишлари, жумладан, «йўл харитаси» ва кейинги қадамлар келишиб олинди.
Шунингдек, Марказий Осиё мамлакатлари мутахассисларининг таълим ва амалий тайёргарлигини йўлга қўйиш, замонавий лабораторияларда тренажёр машғулотларини ташкил этиш ҳамда миллий ядро инфратузилмасини ривожлантириш бўйича экспертлар маслаҳатини йўлга қўйиш масалалари муҳокама қилинди.
Ўзбекистон томони минтақада атом энергетикаси бўйича билим ва тажрибани бирлаштиришга мўлжалланган ихтисослаштирилган марказ концепциясини ҳам тақдим этди. Марказда ядровий ва радиациявий хавфсизлик маданиятини мустаҳкамлаш, меъёрий-ҳуқуқий базани такомиллаштириш ҳамда тинч атомнинг ижтимоий мақбуллигини оширишга эътибор қаратилади.
Томонлар минтақада тинч атом энергетикасини хавфсиз ва масъулиятли ривожлантириш бўйича экспертлар мулоқотини мунтазам давом эттириш ва ҳамкорликни мустаҳкамлашга тайёр эканликларини тасдиқлади.
