Қарорга кўра, Корея Республикасининг “Green Hammer Co., Ltd” компанияси томонидан мазкур инвестиция лойиҳасини амалга ошириш доирасида хорижий корхона — лойиҳа компанияси ташкил этилган.
Ҳужжатга мувофиқ, электр энергиясини сотиб олиш ва қаттиқ маиший чиқиндиларни етказиб бериш тўғрисидаги битимлар доирасида бир қатор чоралар амалга оширилади.
Жумладан, лойиҳа компанияси ишлаб чиқарилган электр энергиясини 30 йил давомида “Ўзэнергосотиш” АЖга кафолатланган тарзда сотади.
Шунингдек, лойиҳа компанияси электр станциясини ягона электр энергияси тармоғига улаш учун зарур бўлган ҳаво электр узатиш тармоқлари ва тегишли электр инфратузилмаси қурилмаларини “Ўзбекистон миллий электр тармоқлари” АЖ томонидан бериладиган техник шартлар асосида қуради. Улар ишга туширилгандан сўнг “Ўзбекистон миллий электр тармоқлари” АЖга топширилади.
Электр станциясини ишга туширишдан олдин лойиҳа компанияси “Миллий диспетчерлик маркази” ДУК ва “Ўзбекистон миллий электр тармоқлари” АЖ билан биргаликда станциянинг электр энергетика тизимига таъсирини баҳолаш бўйича техник хулоса тайёрлайди. Мазкур хулоса асосида тармоққа уланишнинг якуний шартлари келишилади.
“Ўзэнергосотиш” АЖ эса 30 йил давомида ишлаб чиқарилган электр энергиясини миллий валютада кафолатланган тарзда харид қилади.
Бундан ташқари, Агентлик лойиҳа компаниясига 30 йил давомида қаттиқ маиший чиқиндиларни кафолатланган ҳажмда етказиб беради.
Лойиҳа компанияси қурилиш давридаги мажбуриятларини лозим даражада бажаришини таъминлаш мақсадида 7 млн АҚШ доллари миқдорида биринчи даражали банк кафолатини тақдим этади.
