Унда ҳуқуқни муҳофаза қилувчи органлар, вазирлик ва идоралар, илмий муассасалар, фуқаролик жамияти институтлари ҳамда давлат органлари ва ташкилотларининг коррупцияга қарши ички назорат — комплаенс тузилмалари раҳбарлари ва вакиллари иштирок этди.
Йиғилишда мамлакат Президенти томонидан жорий йил коррупцияга қарши кураш соҳасида “фавқулодда ҳолат” йили деб эълон қилингани, шу билан бирга айрим идораларда профилактика ва ички назорат ишлари талаб даражасида эмаслиги кескин танқид қилинди. Хусусан, коррупция омилларини барвақт аниқлаш ва бартараф этишда сусткашликка йўл қўйилаётгани қайд этилди.
Шу билан бирга, коррупцияга нисбатан муросасизлик муҳитини кучайтириш, муқаррар жавобгарлик ва тезкор чоралар таъминланиши зарурлиги алоҳида таъкидланди.
Қайд этилишича, коррупцияга қарши курашувчи идоралар, давлат органлари, илмий муассасалар ва фуқаролик жамияти институтлари ўртасидаги ҳамкорликни тизимли йўлга қўйиш мақсадида Коррупциянинг олдини олиш кластери фаолияти йўлга қўйилмоқда.
Йиғилишда кластер иштирокчиларининг ўзаро ҳамкорлик тартиби, вазифа ва функциялари, улар фаолиятини мувофиқлаштириш ҳамда таҳлил қилиш механизмлари муҳокама қилинди.
Таъкидланишича, кластернинг жорий йилга мўлжалланган иш режасига мувофиқ ҳар чоракда камида битта соҳа комплекс ўрганилади. Ички назорат бўлинмалари томонидан коррупцияга шароит яратаётган омиллар таҳлил қилинади.
Шунингдек, коррупцияга оид жиноятлар улуши юқори бўлган соҳа ва ҳудудлар илмий-тадқиқот муассасаларига бириктирилади. Давлат хизматларини рақамлаштириш, бюрократияни қисқартириш, лицензия ва рухсат бериш тартиб-таомилларини соддалаштириш чоралари кўрилади.
Кластер иштирокчилари ўртасида тезкор ва самарали ҳамкорликни таъминлаш, маълумот алмашиш жараёнларини рақамлаштириш ҳамда таҳлил ишларини ягона тизим асосида ташкил этиш мақсадида “E-klaster” электрон модули ишга туширилиши маълум қилинди.
Йиғилишда белгиланган вазифа ва топшириқларни ўз вақтида ва сифатли амалга оширишда ташаббускорликни ошириш, масъулиятсизлик ва сусткашликка барҳам бериш юзасидан қатъий огоҳлантириш берилди. Ҳар бир субъект фаолияти натижалари доимий мониторинг қилиб борилиши қайд этилди.
Шунингдек, йиғилиш давомида “Рақамли комплаенс” дастурий комплексининг “Давлат харидлари” ва “Одоб-ахлоқ” модуллари тақдимот қилинди.
Унда давлат харидларида манфаатлар тўқнашуви ва аффилланганлик ҳолатларини барвақт аниқлаш, профилактик рақамли назоратни кучайтириш, шунингдек, Одоб-ахлоқ комиссиялари фаолиятини реал вақт режимида мониторинг қилиш ҳамда қоидабузар давлат хизматчилари реестрини шакллантириш имкониятлари ҳақида маълумот берилди.
