Дипломатик каналлар орқали олинган маълумотларга кўра, янгиланган тартиб 1 ноябрдан кучга киради.
Унга мувофиқ, Ўзбекистон фуқаролари Мисрга боришдан олдин кириш визасини ушбу мамлакатнинг дипломатик ваколатхоналари орқали расмийлаштиришлари шарт. Туристик сафарлар эса ваколатли туроператорлар орқали ташкил этилади.
40 ёшгача бўлган сайёҳларга алоҳида талаблар қўйилади
Янги тартибга кўра, 40 ёшгача бўлган сайёҳлар Мисрга фақат яқин оила аъзолари — ота-онаси, турмуш ўртоғи ёки фарзандлари ҳамроҳлигида бориши мумкин. Бунда оила ихтиёрида сафар давомида камида 5 000 АҚШ доллари миқдорида нақд маблағ бўлиши талаб этилади.
40 ёшдан ошган мустақил саёҳатчилар эса камида 3 000 АҚШ доллари миқдорида нақд маблағга эга бўлишлари лозим.
Чегарада қандай ҳужжатлар талаб қилинади?
Мисрга киришда сайёҳлар меҳмонхона брон қилинганини тасдиқловчи ҳужжат, мобил алоқа маълумотлари ва етарли молиявий таъминот мавжудлигини тасдиқловчи маълумотларни тақдим этишлари керак.
Шунингдек, мамлакат ҳудудида бўлиш давомида туристик визани бошқа турдаги визага алмаштириш бўйича мурожаатлар қабул қилинмайди.
Белгиланган талабларга жавоб бермайдиган ёки зарур ҳужжатларни тўлиқ тақдим этмаган йўловчиларнинг Мисрга кириши рад этилиши мумкин. Бундай ҳолатда уларни мамлакатга олиб келган авиакомпания орқали қайтариш чоралари кўрилади.
Ўзбекистоннинг Қоҳира шаҳридаги элчихонаси фуқароларни Мисрга сафарни режалаштиришда янги талабларни инобатга олишга чақирди.
