Ушбу экстрадиция жараёнида халқаро ҳамкорликни ташкил этиш бўйича асосий мувофиқлаштирувчи вазифани Ўзбекистон Республикасидаги Интерпол Миллий марказий бюроси амалга оширди. Бюро ходимларининг изчил саъй-ҳаракатлари туфайли Интерполнинг Қоҳира шаҳридаги Миллий марказий бюроси билан тезкор ахборот алмашинуви йўлга қўйилди, халқаро қидирув доимий назорат қилиб борилди, икки давлат ваколатли идораларининг ўзаро ҳамкорлиги мувофиқлаштирилди.
Шунингдек, товламачилик ва бир қатор бошқа оғир жиноятларни содир этганлиги учун Ўзбекистон Республикаси ҳуқуқни муҳофаза қилувчи органлари ташаббуси билан халқаро қидирувга берилган шахсни қўлга олиш ва кейинчалик экстрадиция қилиш учун зарур материаллар ўз вақтида юборилиши таъминланди.
Интерпол Миллий марказий бюросининг халқаро қидирув бўйича ўтказган тадбирлари натижасида қидирилаётган шахснинг давлатлараро ҳаракатланиш йўналишлари аниқланди ва унинг Миср Араб Республикаси ҳудудида экани тасдиқланди. Интерпол каналлари орқали олинган маълумотлар Мисрнинг ваколатли идораларига қидирувдаги шахсни қўлга олиш имконини берди.
Экстрадиция тўғрисидаги сўров кўриб чиқилгач, Миср Араб Республикасининг ваколатли идоралари қидирувдаги шахсни Ўзбекистон Республикасига топшириш ҳақида қарор қабул қилди.
Барча зарур халқаро-ҳуқуқий тартиб-таомиллар натижасида қидирувдаги шахс Интерполнинг Ўзбекистон Республикасидаги Миллий марказий бюроси ходимларига топширилди ва Ўзбекистон Республикаси қонунчилигига мувофиқ жиноий жавобгарликка тортиш учун мамлакат ҳудудига олиб келинди.
Мазкур экстрадиция халқаро полиция ҳамкорлиги механизмларининг самарадорлиги ҳамда Ўзбекистон Интерпол Миллий марказий бюросининг хорижий ҳуқуқни муҳофаза қилувчи идоралар билан амалий ҳамкорлигининг яна бир ёрқин намунасидир.
Ўзбекистон Республикасидаги Интерпол Миллий марказий бюроси яшириниб юрган жиноятчиларнинг яширинган жойини аниқлаш, халқаро ҳамкорликни ривожлантириш ҳамда қидирувдаги шахслар қайси мамлакатда эканидан қатъи назар, жазонинг муқаррарлиги тамойилини таъминлаш борасидаги тизимли ишларни давом эттиради.
