Мазкур телелойиҳа томошабинларни турли ҳудудларнинг гастрономик маданияти билан таништириб, маҳаллий таомлар, урф-одатлар ва диққатга сазовор масканлар орқали уларнинг ўзига хос жиҳатларини очиб беради. Бундай формат нафақат миллий таомларни, балки туристик манзилларнинг ўзига хослиги, тарихи ва маданий меросини ҳам кенг намойиш этиш имконини беради.
Дастурнинг аудиторияси қарийб 18 миллион нафар томошабинни ташкил этади. Янги кўрсатувларнинг эфирга узатилиши Бухоро ва Хива шаҳарларини Россиянинг кенг аудиториясига танитиш, Ўзбекистоннинг туристик йўналишлари ҳақидаги хабардорликни ошириш ҳамда мамлакатимиз бўйлаб гастрономик саёҳатларга бўлган қизиқишни кучайтиришга хизмат қилади.
Ўзбекистон аввал ҳам мазкур телелойиҳа орқали Россия аудиториясига таништирилган. Аввалроқ "Первый канал" телеканалида Самарқанд ва Тошкент шаҳарларига бағишланган кўрсатувлар эфирга узатилиб, томошабинлар ушбу шаҳарларнинг гастрономик анъаналари ва туристик имкониятлари билан таништирилган эди.
Халқаро медиа лойиҳаларни қўллаб-қувватлаш Ўзбекистоннинг туристик салоҳиятини халқаро миқёсда тарғиб қилишнинг муҳим воситаларидан бири ҳисобланади. Бундай ташаббуслар миллий таомларимиз ва маданий меросимизни оммалаштириш, шунингдек, мамлакатимизнинг турли ҳудудларига саёҳат қилишга бўлган қизиқишни оширишга хизмат қилади.
