Учрашув давомида Миллий туризм ягона платформаси билан Mobiuz рақамли хизматларини интеграция қилиш бўйича истиқболли лойиҳалар кўриб чиқилди. Мазкур ҳамкорлик сайёҳларга Ўзбекистонда бўлиш даврида замонавий рақамли хизматлардан тезкор ва қулай фойдаланиш имкониятларини яратишга хизмат қилади.
Томонлар Миллий туризм ягона платформаси орқали хорижий сайёҳлар учун бепул интернет пакетига эга eSIM хизматини тақдим этиш бўйича ҳамкорликни йўлга қўйиш борасида келишиб олдилар.
Бундан ташқари, томонлар ички туризмни Mobiuz рақамли платформалари орқали тарғиб қилиш, туристик маҳсулот ва хизматларни кенг оммага етказиш, республика ва халқаро миқёсда ташкил этиладиган туризм кўргазмалари, форумлар, фестиваллар ҳамда бошқа йирик тадбирларда ўзаро ҳамкорликни кенгайтириш масалаларини муҳокама қилдилар.
Учрашув якунида белгиланган йўналишлар бўйича амалий ҳамкорликни босқичма-босқич йўлга қўйиш, техник масалаларни биргаликда ишлаб чиқиш ва лойиҳаларни изчил амалга оширишга келишиб олинди. Шунингдек, Туризм қўмитаси ва Mobiuz ўртасида ўзаро ҳамкорликни янада мустаҳкамлашга қаратилган англашув меморандуми имзоланди.
