Бу ҳақда Туризм қўмитаси халқаро ахборот макони, ижтимоий тармоқлар ва фойдаланувчиларнинг қидирув фаоллиги бўйича ўтказилган комплекс таҳлил якунлари асосида маълум қилди.
Таҳлил натижаларига кўра, Ўзбекистон миллий терма жамоаси иштирокидаги учрашувлар кунларида жаҳон оммавий ахборот воситаларида мамлакат ҳақидаги материаллар сони ҳам, Visit Uzbekistan, Travel Uzbekistan va Uzbekistan Tour қидирув сўровлари ҳам бир вақтда сезиларли даражада ошган. Энг юқори ўсиш Колумбия ва Португалия терма жамоаларига қарши ўйинлар вақтида кузатилди.
Қизиқишнинг ортиши нафақат оммавий ахборот воситаларида, балки интернет фойдаланувчиларининг қидирув хатти-ҳаракатларида ҳам яққол намоён бўлди. Бу эса ахборот даражасидаги эътибор мамлакат ва унинг туризм салоҳиятига нисбатан амалий қизиқишга айланганини кўрсатади. Туризм қўмитаси Google Trends ва мониторинг тизими маълумотлари асосида ўтказган тадқиқотга кўра, сўнгги ҳафталарда “Uzbekistan Colombia World Cup 2026” сўрови бўйича қидирувлар 450 фоизга ошган, “Uzbekistan” сўровига умумий қизиқиш 40 фоизга, “Tourism to Uzbekistan” мавзусига оид қидирувлар эса яна 10 фоизга кўпайган. Бу халқаро аудиториянинг Ўзбекистонга бўлган эътибори тобора барқарор туристик қизиқишга айланаётганини тасдиқлайди.
Кампания доирасида Туризм қўмитаси Узбекистан туризм брендининг кенг кўламли халқаро ахборот тарғиботини таъминлади. Мамлакат ҳақидаги материаллар 3 мингдан ортиқ халқаро оммавий ахборот воситалари ва янгиликлар агрегаторларида эълон қилинди. Аудиториянинг умумий жалб этилиши эса 52 миллиондан ортиқ ўзаро таъсирни ташкил этди. Материаллар нафақат спорт нашрларида, балки BBC, ESPN, MSN, The Guardian, Fox News, Daily Mail, NDTV, VnExpress ва бошқа етакчи халқаро оммавий ахборот воситаларида ҳам чоп этилди.
Ўзбекистон миллий терма жамоасининг FIFA World Cup 2026 мусобақасидаги иштироки сўнгги йиллардаги энг ҳаяжонли воқеалардан бирига айланди ва бутун дунё бўйлаб миллионлаб томошабинларнинг эътиборини тортди. Юқори жамоатчилик қизиқиши, кенг муҳокамалар ҳамда халқаро ахборот маконидаги фаол ёритилиш мамлакатнинг халқаро майдондаги танилишига қўшимча туртки берди ва Туризм қўмитаси томонидан амалга оширилган ахборот кампанияси самарадорлигини янада кучайтирди.
Кампаниянинг муҳим йўналишларидан бири жаҳон чемпионати ўтказилган шаҳарларда Туризм қўмитаси томонидан ташкил этилган кенг кўламли бевосита тарғибот дастури бўлди. Миллий туризм стендлари, расмий фан-зоналар ва маданий дастурлар орқали Ўзбекистоннинг туризм салоҳияти халқаро аудиторияга намойиш этилди ҳамда салоҳиятли саёҳатчилар билан тўғридан-тўғри мулоқот ўрнатилди.
Кампаниянинг энг муҳим лойиҳаларидан бири дунёдаги энг йирик авиация марказларидан бири бўлган Атланта халқаро аэропортида Ўзбекистоннинг туризм салоҳиятини тақдим этиш бўлди. Миллий павилён мамлакатнинг сайёҳлик имкониятларини намойиш этувчи асосий майдонлардан бирига айланди. Унда Ўзбекистоннинг туризм салоҳияти тақдимотлари, маданий дастурлар ва бўлажак саёҳатчилар билан бевосита учрашувлар ташкил этилди.
Туризм қўмитаси бундан буён ҳам йирик халқаро тадбирларни Ўзбекистоннинг туризм салоҳиятини тарғиб этишга қаратилган давлат сиёсатини амалга оширишнинг муҳим воситаси сифатида фойдаланишда давом этади.
FIFA World Cup 2026 тажрибаси шуни кўрсатдики, тизимли халқаро коммуникация ишлари нафақат рекорд даражадаги ахборот қамровини таъминлайди, балки жаҳон аудиториясининг эътиборини Ўзбекистонга саёҳат қилишга бўлган барқарор қизиқишга изчил айлантириш ҳамда мамлакатнинг туризм брендини мустаҳкамлашга хизмат қилади.
