Бу ҳақда Давлат меҳнат инспекцияси маълум қилди.
Қайд этилишича, Инспекция томонидан 2–4 октябрь кунлари Қорақалпоғистон Республикаси, Қашқадарё, Наманган, Сурхондарё, Фарғона ва Хоразм вилоятларида пахта йиғим-терими мавсумида меҳнат қонунчилигига риоя этилиши бўйича мониторинг ўтказилди.
Текширувлар давомида айрим ҳолатларда теримчиларга меҳнати учун ҳақ ўз вақтида тўланмагани аниқланган. Натижада уларга тегишли бўлган 8,833 млрд сўм маблағ ундирилиб, тўланиши таъминланган.
"Давлат меҳнат инспекцияси пахта йиғим-терими мавсумида мониторингларни давом эттиради. Бунда теримчиларнинг меҳнат ҳуқуқларига риоя этилиши, иш ҳақининг ўз вақтида тўланиши ҳамда мажбурий меҳнатга йўл қўйилмаслигига алоҳида эътибор қаратилади", дейилади хабарда.
