Бу ҳақда «Speedtest Global Index» рейтинги маълумотлари асосида Рақамли технологиялар вазирлиги ахборот хизмати хабар қилди.
Август ойида Ўзбекистон ҳам мобил, ҳам симли интернет тезлиги бўйича рейтингда уч поғона юқорилаган.
Хусусан, мобил интернет бўйича юклаб олиш тезлиги 62,42 Мбит/с дан 65,27 Мбит/с гача ошган. Натижада Ўзбекистон рейтингда 75-ўриндан 72-ўринга кўтарилган.
Шу тариқа, мамлакатимиз мобил интернет тезлиги бўйича сўнгги 5 йилда 65 поғона юқорилаган.
Симли интернет бўйича юклаб олиш тезлиги ҳам бир ойда 94,23 Мбит/с дан 94,50 Мбит/с гача ошган. Ўзбекистоннинг рейтингдаги ўрни 76-ўриндан 73-ўринга кўтарилган.
Шу билан бирга, МДҲ давлатлари орасида Ўзбекистон симли интернет тезлиги бўйича биринчи ўринни эгалламоқда.
Маълумотларга кўра, 2026 йил бошидан мобил интернетнинг юклаб олиш тезлиги саккиз ой давомида 27 фоизга ошган. Кўрсаткич 51,42 Мбит/с дан 65,27 Мбит/с гача етган.
«Speedtest Global Index» интернет тезлиги кўрсаткичларини мамлакатлар ва ҳудудлар кесимида мунтазам равишда эълон қилиб боради.
