«Хавфсиз ва соғлом юрт» ойлиги доирасида Ички ишлар вазирлиги, Давлат хавфсизлик хизмати ҳамда бошқа ҳуқуқни муҳофаза қилувчи органлар ҳамкорлигида тезкор тадбирлар ўтказилмоқда.
Хусусан, Ички ишлар органлари ва ДХХнинг Тошкент шаҳар бўйича бошқармаси томонидан ўтказилган тадбирлар натижасида товламачилик ва қонунга хилоф равишда қурол сақлаш билан боғлиқ ҳолат аниқланган.
Маълум бўлишича, ҳуқуқни муҳофаза қилувчи органларга икки нафар фуқаро мурожаат қилиб, ўзини «Иззат» деб таништирган шахс ва унинг шериклари томонидан босим ҳамда қўрқитиш йўли билан йирик миқдордаги пул маблағлари товламачилик йўли билан олиб қўйилганини билдирган.
Мурожаатчилардан бири 30 минг АҚШ долларига BMW X5 русумли автомашина олиб беришга мажбур қилинган. Шунингдек, ундан 15 минг АҚШ долларига тенг ошхона мебели учун ҳам пул олинган. Умуман, мазкур фуқародан 70 минг АҚШ доллари олиб қўйилган.
Жабрланувчининг айтишича, у 2019 йилда «Иззат» исмли шахс билан танишган ва дастлаб бирга ишлаган. Кейинчалик гумонланувчи унга босим ўтказиб, ўлдириш билан қўрқитиб, мунтазам равишда пул талаб қила бошлаган.
«Икки-уч йил шундай давом этди. Пулни қўрқитиб, мажбуран бердим. Бир-икки марта мени урган ҳам», — дейди жабрланувчи.
Яна бир мурожаатчи эса мазкур шахс томонидан бизнесга мажбуран шерик қилингани, Туркияда жиноят олами вакили билан учраштирилгани, унга нисбатан зўравонлик ишлатилгани ва қўрқитиш орқали автомашина сотиб олишга ҳамда жами 38 минг АҚШ доллари беришга мажбурланганини билдирган.
Терговга қадар текширув жараёнида яна бир аёл ҳуқуқни муҳофаза қилувчи органларга мурожаат қилган. Унинг билдиришича, гумонланувчи уни шахсий расмларини тарқатиш билан қўрқитиб, учрашишга ва жинсий алоқа қилишга мажбурлаган.
«Шахсий расмларимни тарқатиш билан қўрқитди. Instagram’га чиқариб юборишини, шарманда қилишини айтди. Учрашганимизда ҳам зўравонлик қилди, тазйиқ ўтказди. Шундан кейин ички ишлар органларига мурожаат қилишга мажбур бўлдим», — дейди аёл.
Мурожаатлар юзасидан ўтказилган тезкор тадбирлар давомида гумонланувчининг шахси аниқланган. Тергов маълумотларига кўра, у 1988 йилда туғилган Исоқ исмли шахс бўлиб, «Иззат Назарбек» лақаби билан танилган.
Гумонланувчи Учтепа туманидаги спорт залида ўтказилган тезкор тадбир давомида қўлга олинган.
Тезкор суриштирувлар жараёнида унинг икки дона қурол ва ўқ-дориларни сақлаб келаётгани аниқланган. Кўздан кечириш давомида унга тегишли «Байкал» русумли икки дона тўппонча, уларга мўлжалланган ўқ-дорилар, пичоқлар ҳамда тўппонча ғилофи аниқланиб, холислар иштирокида процессуал тартибда расмийлаштириб олинган.
Ҳозирда мазкур ҳолат юзасидан Тошкент шаҳар Ички ишлар бош бошқармаси ҳузуридаги Тергов бошқармаси томонидан Ўзбекистон Республикаси Жиноят кодексининг 165-моддаси учинчи қисми «а» банди ҳамда 121-моддаси тўртинчи қисми «в» банди билан жиноят иши қўзғатилган.
Гумонланувчига нисбатан қамоққа олиш тарзидаги эҳтиёт чораси танланган.
У ўз қилмишидан пушаймонлигини билдириб, кечирим сўраган.
