Истанбулнинг Малтепе туманида етти қаватли бинонинг қисман қулаб тушиши оқибатида уч киши вайроналар остидан чиқариб олинди. NTV телеканали маълумотига кўра, воқеа жойида қутқарув ишлари давом этмоқда ва аҳоли эвакуация қилинмоқда.
Омон қолганлар орасида 14 ёшли ўсмир ҳам бор. Жабрланганларнинг барчаси шифохонага етказилган, уларнинг аҳволи қониқарли экани айтилмоқда. Муниципалитет расмийлари ушбу манзилда 33 нафар аҳоли рўйхатда туришини маълум қилди. Ҳозирча бино қулаган пайтда ичкарида қанча одам бўлгани номаълум.
Истанбулнинг Анадолу томони бўйича Бош прокуратура ҳодиса тафсилотлари юзасидан тергов бошлади.
Қулаш маҳаллий вақт билан соат 05:40 атрофида Малтепе туманининг Жевизли даҳасида юз берди. Етти қаватли бинонинг бир томонидаги учта қават қулаб тушди. Бинонинг қуйи қаватларида тўқимачилик устахонаси ва савдо дўконлари жойлашган. Ҳодиса вақтида улар ёпиқ эди.
Ҳозирда вайроналар остида қолиб кетган одамларнинг аниқ сони ҳақида маълумот йўқ. Воқеа жойида кўплаб қутқарув ва тиббиёт гуруҳлари ишламоқда, шунингдек, юқори қаватларда ва бинонинг шикастланмаган қисмида қолиб кетган аҳоли эвакуация қилинмоқда, деб хабар берди tass.ru.
