Нукус шаҳрида фуқароларнинг банк карталаридан пул маблағларини ноқонуний ўзлаштириш билан шуғулланган шахслар гуруҳи фаолияти фош этилди.

Қорақалпоғистон Республикаси Ички ишлар вазирлиги Кибержиноятларга қарши курашиш бошқармаси ҳамда Давлат хавфсизлик хизмати ҳудудий бошқармаси тезкор ходимлари томонидан «Хавфсиз ва соғлом юрт» ва «Кибермаданиятни юксалтириш ойлиги» тадбирлари доирасида ўтказилган тезкор тадбирларда бир гуруҳ шахслар қўлга олинган.

Аниқланишича, гуруҳ аъзолари Telegram орқали тарқатиладиган зарарли APK-файллар ёрдамида фуқароларнинг банк карталаридаги маблағларни ўзлаштириш схемасини йўлга қўйган.

Текширувда аниқланишича, банк карталаридан ноқонуний ечиб олинган маблағларнинг бир қисми нақдлаштирилган. Айрим пуллар номаълум шахсларнинг онлайн микрокредитларини сўндиришга, бошқа маблағлар эса онлайн букмекерлик аккаунтларига ўтказилган.

Жиноий ҳаракатларни яшириш мақсадида ижарага олинган телефонлар мунтазам алмаштириб турилган.

Тезкор тадбирлар давомида Telegram ёзишмаларида 162 та банк пластик картасига оид маълумотлар мавжудлиги аниқланган. Шунингдек, учта мобил қурилма ва бешта банк картаси ашёвий далил сифатида олинган.

Мазкур ҳолат юзасидан суд қарорига асосан, Д. исмли шахсга нисбатан қамоққа олиш эҳтиёт чораси қўлланилган. Ҳозирда дастлабки тергов ҳаракатлари олиб борилмоқда.

Ҳуқуқни муҳофаза қилувчи органлар фуқароларни киберхавфсизлик қоидаларига риоя этишга чақирмоқда.

Хусусан, номаълум манбалардан келган APK-файлларни телефонга ўрнатмаслик, шубҳали ҳаволаларни очмаслик, банк картаси маълумотлари ва SMS-кодларни бошқаларга бермаслик тавсия этилмоқда.

Шунингдек, ижтимоий тармоқларда «кредитингизни қоплаб берамиз» деган таклифлар билан мурожаат қилаётган шахсларга ишонмаслик зарурлиги эслатилди.