Бу ҳақда Хитой Фанлар академияси Шанхай астрономия обсерваторияси кичик илмий ходими Чжан Сзязюн “Нима учун биз Марсга борамиз?” номли мақоласида маълум қилди, дея хабар берди naked-science.ru.

Чжаннинг сўзларига кўра, инсоният Марсда доимий равишда бўла олиши учун учта асосий вазифани ҳал қилиши керак: Ер ва Марс ўртасида маълумот алмашинувини таъминлаш, икки сайёра ўртасида юк ташишни йўлга қўйиш ва “Қизил сайёра”да одамларнинг омон қолиши учун шароит яратиш.

Фазовий аппаратлар алоқаси ва навигацияси учун Шанхай астрономия обсерваторияси раҳбарлигида ишлаб чиқилган ўта узун базали радиоинтерферометрия асосидаги орбиталарни аниқлаш тизимидан фойдаланилади. У Марсга йўл олган аппаратлар траекториясини юқори аниқликда белгилаб олиш имконини беради ва уларнинг орбитага муваффақиятли чиқишини таъминлашга ёрдам беради. Чжаннинг таъкидлашича, ушбу технология Хитойнинг “Тянвен-1” Марс миссияси давомида синовдан ўтказилган.

Иккинчи вазифа — Ер ва Марс ўртасида моддий объектлар алмашинувини ташкил этиш. Инсоният аллақачон Қизил сайёрага космик аппаратларни юборишни ўрганиб олган, бироқ ҳозирча Марс моддасини Ерга етказиб бериш технологиясига эга эмас.

Чжаннинг сўзларига кўра, энди Хитой кейинги қадамни қўйишни режалаштирмоқда: тахминан 2031 йилда Марс тупроғи намуналарини Ерга етказиб бериш. “Тянвен-3” миссияси тахминан 2028 йилга мўлжалланган.

Учинчи вазифа — Марсда инсоннинг омон қолишини таъминлаш. Сайёрада жуда паст ҳарорат, юқори радиация даражаси, кучсиз гравитация ва паст атмосфера босими мавжуд. Бундан ташқари, сув ва кислороддан фойдаланиш имконияти чекланган.

Олимнинг сўзларига кўра, одамларнинг ҳаётини таъминлаш ва тадқиқот ишларини олиб бориш учун маҳаллий ресурслардан қандай фойдаланиш кераклигини аниқлаш керак.

Бошқа осмон жисмлари анча узоқда жойлашган.

Чжаннинг фикрича, бу қийинчиликларга қарамай, инсоният Ер-Ой тизимидан ташқарига чиқиб, узоқ коинотни ўзлаштира бошлагач, Марс эришиладиган мақсад бўлиб қолмоқда.

Меркурий Қуёшга жуда яқин, Венерадаги шароит эса ўзлаштириш учун жуда ноқулай. Бошқа осмон жисмлари анча узоқда жойлашган. Бу фонда Марс бир қатор афзалликларга эга: унда сийраклашган атмосфера ва сув музи мавжуд, сутканинг давомийлиги ва йил фаслларининг алмашинуви эса Ердагидек. Бу хусусиятлар Қизил сайёрани сайёралараро цивилизация йўлидаги мос оралиқ босқичга айлантиради, деди тадқиқотчи.