Тадқиқот натижалари Frontiers in Insect Science журналида эълон қилинди.
Тадқиқот муаллифларидан бири, Тюмень давлат университетининг Экологик ва қишлоқ хўжалиги биологияси институти (X-BIO) директори Роман Яковлевнинг айтишича, Нигер дарёси соҳилидаги саванна ҳудудида ҳамда Мали пойтахти Бамако атрофида турли хил фумигаторлар синови ўтказилган.
Унинг таъкидлашича, чивинларга қарши энг яхши ҳимоя воситаси — бу буғлантирувчи фумигаторлардир. Олимларнинг тушунтиришича, улар таркибидаги учувчан пиретроид моддалар нерв импульсларининг узатилишини тўсиб, ҳашаротларни фалаж ҳолатга келтиради. Синовлар шуни ҳам кўрсатдики, электрон иситгичли фумигаторлар атрофида кўзга кўринмас ҳимоя “гумбази”ни ҳосил қилади. Айни пайтда, тутун чиқарувчи спираллар ва ультратовушли “пишилдоқ” қурилмалар чивинларни анча кучсиз ҳайдаган ёки умуман самара бермаган. Бундан ташқари, тадқиқотчилар цитрус ҳидли шамлар ҳам чивинларга қарши деярли самарасиз эканини қайд этди, деб хабар берди lenta.ru.
